Delhi, Jylliew 7: Ki paid riewlum ka Manipur kynthup ia ki Kuki-Zomi-Hmar-Mizo kiba sah ha Delhi, kila iamih paidbah ban pynlong ia ka jingiaid rally hynne ka sngi Balang sha ka Iingsah u Myntri kam Pohiing ka Ri u Amit Shah.
Kine ki nongiaid rally kiba rah ia ki placard ba thoh “Kuki Lives matter”, “Article 356 not 355 “ kila tur sha iingsah u Myntri kam pohiing ka ri ha Delhi. Ki nongiakhih kila dawa ban wanrah pat ia ka jingshongsuk bad ka jingshngain jong ki paid riewlum kiba shong ba sah ha Manipur, kaba don hapdeng ka thma iapher Jaidbynriew.
Namar ka thma iapher jaidbynriew hapdeng ki Meitei bad ki Kuki ha Manipur, ki paid riewlum ka Manipur kila iamih paidbah ban dawa ia ka Sorkar Pdeng ba kan ai jingiada ia ki briew kiba dei na ki paid riewlum.
Ki nongiakhih ha ka shithi ba la phah sha u Myntri ka Sorkar pdeng kila dawa ba dei ban ai ka jingiada ba pura ia ki Shnong jong ki Kuki da kaba buh ia ki ktem ki shipai ha kjat jong u lum ba ki sah khnang ba kin tehlakam ia ka jingthmu hiar thma jong ki heh paid Meitei.
Kila dawa ruh ia ki bor shipai kynthup ki Commando, IRB, MR bad kiwei ba kin iaid pahara hapoh ka Jylla ne ban shong hala ki jong ki ktem khnang ba lada donkam kin mih ha kano kano ka por.
Nalor kane, ban pynlong ruh ia ka jingkhynra ban kem ia ki kaikhlaw Arambai Tenggol bad Meitei Leepun bad ban kurup noh ia baroh ki tiar siat bala tuh na ki Pulit.
Kila dawa ruh ban pynkynriah kam noh ia baroh ki Ophisar kiba dei na ka jaidbynriew Meitei, ki shipai Indian Army bad CAPF shabar jong ka Jylla Manipur.
Kine ki Nongiakhih kila ong ba satang lada u Amit Shah u shimkhia mardor ban leh eiei halor kine ki jingdawa, ka shong satang ka por ba ki shnong Kuki ha Manipur kin shah sar khuid ha ki kaikhlaw Meitei kiba ka thong jong ki, ka long pyrshah ia ka India, kata ban pynlong ia ka Manipur ka ri kaba laitluid.
