Agartala, Nailar 23: Ki dkhot jong ka Youth Congress ha Tripura hynnin ka sngi Nyngkong kila leit ban gherao ia ka headquarter jong ki pulit ka Tripura hapoh Agartala ban dawa kem mardor ia ki runar kiba donkti ha kaba thombor ia ka iingsah jong u Keshab Sarkar.
Ka iingsah jong u Keshab Sarkar, uba la mih noh na ka sorkar synshar BJP bad pyniasoh ia lade bad ka Congress ka la shah pynjulor ha ki briew ia kiba la kynnoh ki dei ki nongtrei jong ka BJP ha Majlishpur kaba hap hapoh Jirania police station haTripura ha ka sngi Saitjain ba la lah.
Na ka liang u Sarkar ula kynnoh ba wat hadien ba ula phone bun bunsien, hynrei ki pulit kila wan poi hadien katto katne kynta, kata hadien ba kine ki nongthombor ki la phet noh na kane ka iingsah jong u.
U President ka seng Congress ha Tripura u Birajit Sinha ula kynnoh ia ka jingdonkti jong ki kynhun runar ba la kyrshan da ka seng BJP ha lyndet katei ka jingshah thombor kumjuh ha kaba iadei bad ka jingshah thombor jong ki nongialam liang pyrshah bad ki nongkyrshan namar ka jingioh jingkyrshan na ki myntri sorkar.
Ki nongtrei ka Youth Congress ki la khang noh ia ka jaka rung shapoh katei ka headquarter jong ki pulit bad dawa ba dei ban kem mardor ia kitei ki briew kiba donkti ha katei ka kam thombor bad ruh ban sospon ia u sub-divisional police officer (SDPO) na ka kam namar hapoh ka jingkhmih ka jong u, u MLA ka Congress, u Sudip Roy Barman ula ngat ha ka jingshah thombor ha ka 11 tarik mynta u bnai hapoh Jirania.
Na ka liang ka Youth Congress ka la ai por ruh ia ki pulit 72 kynta ba ki dei ban kem ia kitei ki runar kiba donkti ha katei ka kam thombor.
Ka liang pyrshah CPI (M) ruh ka la kynnoh ia ka jingdonkti jong ka seng BJP halor katei ka kam thombor.U Myntri Rangbah (CM) barim, u Manik Sarkar ha ryngkat kiwei pat ki nongialam ka CPI (M) ki la pynlong ka jingleit jurip sha Jirania ha kane ka sngi U Blei ba la lah ban bishar bniah halor ka jinglong jingman.
Da kaba pynrem jur ia katei ka kam thombor, na ka liang u CM barim ula kynnoh ba ka Tripura ka la kylla long ka jaka riehtngen na ka bynta ki kynhun riew pyntriem.
Kham hashwa na ka liang u Sarkar ula shah pynngat hapoh ka kyndon ain National Security Act ha ka snem 2018, kata khyndiat bnai hadien ba ka kynhun synrop ba la lamkhmat da ka BJP ka la wan ha ka bor.
Hadien ba ula lait jamin, kata hadien saw bnai shiteng, u Sarkar ula ong ba ula kylla long u lanot na ki jingiasylla sain hima ba la pynkhreh da ki paralok ka party jong u hi.
