Shillong Nailar 13: Ki paidbah ryngkat bad ki bahaïing bahasem, hynne ka sngi Saitjain kila pynlong iaka jingkynmaw burom iaka lyngkhuh sngi iap ba nyngkong jong u Bah Cheristerfield Thangkhiew da kaba leit buh syntiew ha u lum jingtep jong une u nongialam barim ka seng Hynniewtrep National Liberation Council (HNLC) uba la shah siat iap ha ki pulit haka iingsah ka jong u haka 13 tarik u Nailar 2021.
Ha kane ka sngi, la sakhi ba ki paidbah ryngkat bad ki nongialam Sengbhalang kila ia poi sha ka iingsah jong u Bah Cheris kaba don ha Mawlai Kynton Massar bad hashwa ban sdang ka jingiaid paidbah ban leit buh syntiew, la ioh iaka jingduwai naka iing ka sem bad la ioh ruh iaka jingkren na u Bah Granary Starfield Thangkhiew uba long u Para jong u Bah Cheris.
Hadien kane, ki paidbah kila mih na katei ka iing bad kila iaid da ka kjat ban leit buh syntiew ha u Lum Jingtep uba don ha Lawmali.
Ha katei ka jingleit buh syntiew ia une u nongialam barim ka HNLC, la sakhi ba kila don bun ngut ki briew kiba la iashim bynta bad ynda la poi ha Mawlai Stand Bus naka liang ka u Bah Garany Thangkhiew ula pynher ia ki Balloon Iong bad ula pyllait iaka Sticker kaba la pynmih daka Sur ka Bri u Hynniewtrep bad hadien kane kila bteng biang iaka jingiaid kjat haduh ban da poi ha u lum jingtep jong u Bah Cheris.
Ki bahaiing bahasem, ki nongialam sengbhlang bad kiwei kiwei kila buh syntiew kum ka dak ban kynmaw burom ia u Bah Cheris ha u lum jingtep bad la buh ruh ia u syntiew uba la phah daka seng HNLC lyngba u Bah Sadon Blah uba mihkhmat iaka HNLC haka jingiakren iasuk bad ka sorkar jylla bad sorkar pdeng bad ynda la dep ban buh syntiew la pynbud pat da ka jingbuh duwai na ka liang jong ka iing.
Ki nongialam sengbhalang bad ki bahaiing bahasem kila pynpaw ba ia mynta hi kin ap beit iaka sorkar jylla ba kan pyllait ia katei ka kaiphod jingtohkit haka 9 tarik u Nailur haka iingdorbar thawain ka jylla bad kin sa shim ia ka rai hadien ba kila iohi ia kaei kaba mih ne lap daka kynhun tohkit halor ka jingshah siat iap u Bah Cheris hala iingsah.
Kumban shu pynkynmaw haka 13 tarik u Nailar 2021, ki pulit kila leit khynra iaka iingsah jong u Bah Cheristarfield Thangkhiew kila leit rung ha ka Iingsah jong une u Nongialam barim ka HNLC, ha ka por 3 baje dang step phyrngab bad ki pulit kila kam ba u Bah Cheristerfield ula iakhun pyrshah ia ka kynhun ki Pulit da ka tari da ka jingthmu ban phet krad bad ki Pulit kila hap ban siat ia u kum ka jingialeh markylliang.
U Director General of Police (DGP) barim ka jylla u R Chandranathan ha katei ka sngi, ula iathuh ba u Bah Cheristerfield ula mynsaw na ka jingshah siat bad la kit mar mar ia u sha Hospital hynrei ynda poi ha Hospital, ki Doktor kila pynbna ba ula khlad lypa ha lynti.
Une u Heh Pulit u iathuh ba ha katei ka jingleit khynra, ka kynhun ki Pulit kila ioh ban kurup ia kawei ka pistol 9mm, kawei ka tari, kawei ka laptop bad katto katne tylli ki mobile phone kiba pyndonkam da u General Secretary barim ka HNLC bad ula ong, ki pulit kila leit da ka jingthmu ban kem ia u Bah Cheristerfield hadien ba kila ioh ia ki jingtip kiba thikna ba u dei uba donkti ha kaba iadei bad ka jingpynbthei ia u bomb IED ha East Jaintia Hills bad ha Laitumkhrah.
U Bah Cheristerfield Thangkhiew ula don nyngkong eh ha ka kynhun kiengatiar Hynniewtrep Achik Liberation Council (HALC), hynrei hadien ba la pynkut noh ia katei ka seng, u la donbynta ha ka jingseng ia ka HNLC ha u snem 1997 bad ula bat kum u General Secretary bad ha u bnai Risaw jong u snem 2018 ula wan pyndem wait noh ialade hakhmat jong u Symbud Myntri Rangbah ka Jylla Bah Prestone Tynsong.
