Nongpoh, Naitung 18 : Ki Nongialam ka RBYF bad ki riew rangbah ka thain, kila leit ban ai mynsiem bad kitbok kit rwiang ia ka kynhun ialehkai phutbol ki Kynthei U-17 jong ka skul Saiden Secondary School, ka ban mihkhmat ia ka Ri-Bhoi District sha ka State Level Inter School Subroto Cup Football Tournament 2023.
Kane ka lympung ialehkai kan sdang naduh ka 23 tarik Naitung ha Nongbah Shillong.
Hashuwa ba ka kynhun ialehkai kan mih na District, ki bor pyniaid skul kila pynlog ia ka prokram ba kyrpang ban kitbok kit rwiang ia ki thei ialehkai ka kynhun bala pynlong ha ka sngi Ba-ar ha Iingdorbar ka shnong Saiden.
Ha kane ka sngi, la wan ban ai mynsiem bad kitbok kitrwiang ia kane ka kynhun da ki riew pawkhmat ka them Ri Bhoi District kiba kynthup ia u Bah Bipul Thangkhiew, President ka RBYF, Sengkmie kum u kongsan, u Bah Rocky Marwein kum u symbut kongsan, u Bah EK Lapang, Rangbah Shnong ka Saiden, u Bah Sumarlang Swer, Coach jong ka kynhun ialehkai, ki nongialam ka RBYF, ka Seng Samla Saiden nalor kiwei kiwei ki riew rangbah.
Haba kren ha kane ka prokram, u Bah EK Lapang kum u Rangbah Shnong bad ruh kum u dkhot ka Committee jong ka Saiden Secondary School, u la pynpaw ia ka jingkmen kaba khraw halor ka jinglah jong kane ka shlem jingnang jingstad ban kot syndon sha ka thong ban ioh leit mihkhmat ia ka Ri Bhoi District sha katei ka lympung ialehkai football ki skul kaban sa long ha Nongbah Shillong.
U la iathuh ruh, ba kane ka iingskul ka dei kaba dang don hapdeng shibun ki jingduna hynrei khlem da shongthait ne thiah thai, ka jingtreishitom ki nonghikai ymtang ban ai jingnang jingstad hynrei ban plie lad ruh ia ki khynnah pule kiba donsap ialehkai football,l ka la lah ban pynurlong ia kane ka jingangnud kaba da ki snem ban kot sha katei ka thong ban mihkhmat ia ka district ha ka Subroto Cup.
Na ka liang ki kongsan ha kane ka sngi, ki la ai ia ka jingiaroh ia ki khynnah ialehkai jong ka Saiden SS, kiba da ka jingtrei minot ka jong ki bad ka jingpyndonkam hok ia la ka sap bad ka sap pyntbit ba ki la ioh ki la kot pat sha ka thong ban leit mihkhmat na Ri Bhoi District sha ka State Level jong ka Subroto Cup kaban sa long shen ha Nongbah Shillong, da kaba ki la ai ruh ia ka jingkitbok kitrwiang ba kin lah ban ialehkai bha ha katei ka state level bad ban lah ban wanrah ia ka nam ka burom ia ka district hi baroh kawei.
Shuh shuh ruh, kum ki riew pawkhmat ka district Ri Bhoi, u Bah Bipul Thangkhiew bad u Bah Rocky Marwein, da kaba ai ruh ia ki kyntien kyntu kynpham, ki la ai mynsiem ruh ia ki bor pyniaid skul ka Saiden SS da kaba ki la long kiba kloi ban noh ia u synniang ban ai jingiarap sha kane ka skul ban tynrong lem ia ki jinglut jingsep bad ki jingdonkam jong kane ka kynhun ialehkai jong ki kynthei ha ka U-17.
Ki bor pyniaid skul ka Saiden Secondary School lyngba u Principal u Bah James Nongsiej, ha kane ka sngi, ki la ai khublei kyrpang ruh bad ka jingkitbok kitrwiang ruh ia kito ki riew shimet bad ki kynhun sengbhalang bad kiwei kiwei kiba la kyrshan ia kane ka kynhun ha kiba bun ki liang katba ki dang shimbynta ha ka lympung ialehkai jong ka District Level Subroto Cup 2023.
Pule lang ia kane: Pynpaw ka Myntri ba ym sngew iahap ia ka jingdawa Winter Capital ka ACHIK
