Tura, Naitung 4 : Ka A’chik Heritage Pursuit ha ka jingpyrshang ban tynrong lang ban maramot biang ia ki bun ki jaka kiba la shah ktah jur ha ka jingshlei um bad twa khyndew dang shen, ha kane ka sngi Saitjain bad sngi U Blei ka laleit ban ai jingiarap sha kito ki lanot kiba ngat ha katei ka apot. Katei ka kynhun da kaba treilang bad bun ki riewpaidbah ka la lum ia ki song jingiarap, kynthup naduh ki marbam bad ki jain ki nep ban leit sam sha kitei ki jaka.
Ki la leit ruh sha Rengdim lyngba ka Shallang ban leit ai ia kitei ki song jingiarap. Na Rengdim, ka kynhun kaba kynthup ia ki nongshong shnong hi ki la rah pat ia ki tiar iarap da ka kjat na ka bynta kumba 7kilometer ei ei ban leit ai pat sha kito ki lanot kiba don ha Kalu, ka thain kaba dkut lut ki lynti syngkien mynta la kumba lai taiew ei ei.
Lyngba katei ka jingpyrshang, kumba 100 tylli ki longiing ki la ioh jingmyntoi khamtam eh ha Kalu bad ki shnong ba marjan.
Na ka liang ka A’chik Heritage Pursuit ka la pynpaw ka jingsngewnguh ia ki nongkyrshan mon sngewbha kynthup naduh ka tnad Forest Tura kiba la kyrshan da kaba ia ki kali kit jingkit, nangta kiwei pat kum ka Tura Baptist Church, Aeroville School, Don Bosco College Batch jong u 97-2002, Dura Wasa Club, PWD Buildings Division, PHE Rongjeng, Chiring Dokru SHG, CEM, GHADC, Father Fellowship Football Team, Garo Engineering Band, Bolanchi Ading locality, Blue Van Tura , Wildlife Trust of India bad Kusimkol Baptist Church.
Ka kynhun na Siju bad Rengdim ruh da ka mon sngewbha ki la mih ban don bynta lang ha katei ka kam. Ki don ruh bun ki riewshimet na Tura, Dalu, Williamnagar bad kiwei ki jaka kiba lasnoh kti lang.
La ioh ruh ban lum haduh 3.80 lak tyngka na ki nongai sngewbha na ka bynta katei ka kam. Ka kynhun ka la ioh ruh ban sam ia ki tyrpa, ka umphniang sharak, ki stove, ki tiar shet, ki jain kup syaid bad ki marbam sha kumba 21 tylli ki longiing.
Ia kane ka kynhun la maitphang da u Jimmy G Marak na ka shnong Kalu .
Ka kynhun ka la ioh ruh ban sam haduh kumba 20 byrni u khaw, nalor ka shini, dai mluh bad ka umphniang sharak sha u Nokma jong ka Rongcheng uba ladon ha Rengdim. La aiti ruh ia ka song pisa kaba mar 50,000 tyngka sha u Nokma ka Rengdim, Kalu bad Rongcheng ban pyndonkam naka bynta ki nongleit iarap ban pynpoi ia kitei ki tiar.
Ka kynhun ka la pynpaw ruh ka jingsngewnguh ruh ia u Bandi Marak jongka GHADC uba la pynbiang ia ka bam ka dih ha Rongjeng, nangta u SDO (PHE) uba la pynbeit ban kynduh lang ia ka kynhun ha katei ka jaka ha shwa ban leit ai jingiarap kylleng kylleng.
Na ka liang ka kynhun ka ai ruh ka jingsngewnguh ia baroh kiba la don bynta ha katei ka kam bad phah ruh ia ka kyrwoh ba da ka mynsiem iarap ki lah ban wanrah ia ka jingkylla ha kum katei ka apot.
