Guwahati, Naitung 21: Hadien ba ka jingniew ia ki vote ka la pyni ia ka dak ka jingjop na ka bynta ka Droupadi Murmu ka ba dei ka kyrtong ba la kyrshan da ka National Democratic Alliance (NDA) ha ka jingjied president bathymmai hapoh ka ri, ki jingialehkmen ha baroh kawei ka ri bad ha Assam ka la iaid shakhmat.
Ia ka jinglehkmen ka ba kongsan la pynlong ha Guwahati ha ka ba haduh kumba 10,000 ngut ki nongkyrshan ka BJP ki la mih paidbah hapoh ka jingialam jong u Myntri Rangbah (CM) Himanta Biswa Sarma.
Hapoh ka shnong trai jong ka Murmu ha Rairangpur, Odisha ka jingap khmih lynti ia ka jingjop jong ka, ka la pynlong ia ki nongshong shnong ba kin shna ia ki jingbam bad pynkhreh na ka bynta ka jingialehkmen naduh hynnin ka sngi Balang.
Na ka liang ki nongshong shnong ki la pynkhreh ruh na ka bynta ban pynlong da ka jingiaid paidbah ha ryngkat ki jingshad tynrai mynta ka sngi.
Ka Seng BJP ka don ruh ia ka jingthmu ban pynlong da ka jingialehkmen ka ba heh bha hapoh ka jylla jong ka Murmu. Na ka liang u nongialam ka BJP ha kane ka thain u Tapan Mahanta u la ong ba ka jingpynkhreh ia ki 20,000 tylli ki jingbam laddu ka la iaid shakhmat kumjuh ka jingpynkhreh ia ki 100 tylli ki banar jingai khublei na ka bynta ka Murmu.
