Yn leit tynruh hi ki samla sha u Myntri ba shu kular kai ïa ka madan phlang plastik
Nongstoiñ, Nailar 20: Ki samla jong ka West Khasi Hills ki la pynkhreh ban leit iakren hi bad u bah Banteidor Lyngdoh Sports Minister ban tynruh halor ka jingbym ïoh ka sor Nongstoiñ ïa ka Artificial turf lane u phlang plastic, kumba u Myntri u la kular bad pynbna paidbah naduh u snem 2019.
Haba ïakren bad u nongthoh khubor, u bah Wanphai Dkhar uwei na ki samla ba kit ia ka bha ka mïat jong ki samla ka thaiñ u la ong, “Na ka liang ki jong ngi ki samla ngin sa leit hi noh ban ïakren bad wad jingshai na u Myntri ialehkai bad na ka Directorate jong ka Sports halor ka jingai madan phlang plastic ha ka District”.
“U Myntri u la dep kular mynshuwa bad pynbna ruh ba yn sa pynïoh noh ïa ka Nongstoiñ da ka artificial turf, ha ka por ba u wan long kum u kongsan ban khang ïa ka football tournament ha Nongstoiñ ha u snem 2018-19” ula ong.
U Bah Wanphai ula ong “Ka jingkular u Myntri kala pynkmen bha ia ngi ha katei ka por namar haba ngi peit ka kam ialehkai ha West Khasi khamtam ka Football bad ka Athletic, ka kiew sted bha ha kine ki por ba mynta”.
Ula ong ba shibun ki khynnah samla kiba don ïa ka sap ïalehkai football ki la kiew bad ki la shah jied ruh ha ki klop kiba heh baheh jong ka Jylla.
“Hynrei haba ïohi pat ïa ka rai jong ka Tnad ialehkai ka Jylla, ka bym shym la kynthup ban pynïoh noh ïa ka madan kaba katkum ka standard kaba mynta, ka long kaei kaei kaba sngewsih shibun. Bunsien ngi shah iehnoh beiñ ha ka liang ki kam ïalehkai. Ngi da sngew ba kane ka long ka jingiuhroit bad ibeiñ ïa ka Nongstoiñ bad ïa ki khynnah ïalehkai”, ong u Bah Wanphai.
Na ka liang u Samla Moslander Marngar uwei na ki samla rangbah jong ka Youth Wing ka UDP, u la kynthoh jur ïa kane ka jingleh shilliang jong ka Tnad ialehkai ka jylla. U la ong ruh ba un ai ka jingkyrshan ïa kine ki samla ki ban leit ïakynduh ïa u Sports minister ban dawa ïa ka hok.
U la ong ruh ba ka NDSA ka dei kawei ka Association kaba la rim bha hapoh ka Jylla kaba dei peit ïa baroh ki liang ha ki kam ialehkai. Kane ka synjuk ruh ka la pyrshang mynshuwa ban pan ia ka artificial turf hynrei ha kito ki por ruh ka Nongstoiñ ka la duh noh bad la ïoh da ka Mawkyrwat.
“Te kane kam dei shuh ka sien kaba nyngkong ba ka Tnad ialehkai ka jylla ka leh shilliang khmat ïa ka Nongstoiñ “ ula ong.
