Aizawl, Nailar19: Ka Lunglei Battalion na ka tnat 23 Sector Assam Rifles hapoh ka jingialam jong u Inspector General Assam Rifles (East), ka la pynlong ka jingleh burom da ka ba leit buh syntiew hynnin ka sngi Palei shi bynta ban leh burom ia ki 18 ngut ki riewshlur jong kane ka battation kiba la aiti la ka jingim ha ka jingiakhun pyrshah ia ki lehnoh lyngba ka ‘Operation Hifazat’ ha Manipur ha ka 18 tarik u Nailar 1994.
Ka jingthoh ka pynpaw ba ha ka 18 tarik u Nailar 1994, la pynlong ia ka jingleit khynra lehnoh kaba kyrpang hapoh ka jingialam jong u Major Sirohi bad uwei u JCO lem bad 30 ngut ki dkhot ka tnat shipai ha ki bynta jong ka Sangkhomei-Willong ka Manipur.
Kane ka kynhun ka la mih na Shakhomei lyngba ka jaka khlaw jong ka Yangkhullen. Hynrei hadien ba kane ka kynhun ka la wan poi ha Yangkhonou, ka jaka khlaw ba rben kaba don ia ka jaka shong jong ki lehnoh GHQ ka NSCN (IM) kane ka kynhun ka la ngat kynsan ha ka jingshah ther kuli ka ba jur na ki dkhot jong ka kynhun NSCN (IM).
U Harka Bahadur Thapa lem bad 17 ngut kiwei pat ki dkhot kane ka tnat shipai khlem da khuslai iala ka jong ka jingim kila tur shakhmat bad pynphai kuli markylliang sha kine ki lehnoh.Ha kane ka jingiather kuli kine ki dkhot ka tnat shipai ki la kyllon iap na ka jingdei kuli bad aiti iala ka jingim na ka bynta ka ri.
Na ka liang u Commandant jong ka Naga Hills Battalion katba u dang pynlong ia ka jingbuh syntiew, u la kdew halor ki jingshisha ba katei ka jingshlur ba la pynpaw da kitei ki bor shipai jong ka battalion ka la iai bteng ban ai mynsiem na ka bynta kane ka tnat shipai ba kan iaid shaphrang ha ka ba iadei bad ki kam iakhun pyrshah lehnoh.
Ka Lunglei Battalion ka la bteng ban pynlong ia ki prokram ba kongsan jong ka ri, kum ha ka ba leh burom ia ki riewshlur, ka jingrakhe ia ka sngi laitluid bad ia ka Kargil Diwas, kaba la iarap ban pynioh ia ka mynsiem ieit ri bad ka jinglen lade na ka bynta ka ri hapdeng ki paidbah nongshong shnong jong ka thain.
