Shillong, Nailur 29 : Ki Arngut ki Myntri Rangbah ka Jylla Assam bad Meghalaya-u Himanta Biswa Sarma bad u Conrad K Sangma, kin shong jingialang lashai ka sngi ka 30 tarik Nailur, ban iakren halor ki kam iapynbeit ia u pud u sam ba don hapdeng ka jingiakajia.
Kane ka jingialang ki arngut ki Myntri Rangbah kan long ha State Guest House (Koinadara), Khanapara, Guwahati ha ka por 1 baje janmiet.
Kane kan dei ka jingialang ba nyngkong eh hapdeng ki Myntri Rangbah ban pyntyllun shakhmat ia ka jingiakren pynbeit pud jong ka wat kaba ar (2nd Phase) hadien ba ki Regional Committee bala thaw da baroh arliang Sorkar, kila dep iakynduh para maki.
Haduh 12 tylli ki jaka ki don hapdeng ka jingiakajia pud hapdeng ka Assam bad ka Meghalaya hynrei ha ka wat iakren pynbeit pud ba nyngkong, ki ar Jylla kila dep ban iapynbeit ia hynriew tylli ki jaka bad ki ar Sorkar kila dep iasoi ia ka Memorandum of Understanding (MoU) ha ka 29 tarik Lber 2023 hakhmat u Myntri kam Pohiing ka Ri Amit Shah.
Kine ki hynriew tylli ki jaka bala dep iakren pynbeit ki dei ka Tarabari, Hahim, Pilangkata, Khanapara, Ratacheera bad Gijang kaba don haduh 36.79 sqaure Kilometer.
Ki hynriew tylli ki jaka bala pynhap ha ka wat iakren kaba ar (Phasi-II) ki kynthup ia ka Langpih ha West Khasi Hills, ka Borduar, Nongwah-Mawtamur, Deshdoomreah, Block –II kiba hap ha Ri-Bhoi District bad ka Psiar- Khanduli bad Block-I ha West Jaintia Hills District.
