Shillong, Sept 29: Ka Meghalaya ryngkat bad ki 5 tylli ki jylla jongka North East Cricket Development Council (NECDC) kin iakhun tyngeh ban rah ia ka nam lahduh ha ka lympung 1st Senior Women’s Interstate Friendship T20 Tournament, kaban sdang ha ka sngi nyngkong.
Kane ka lympung ialehkai kadei kaban pynlong da ka Meghalaya Cricket Association (MCA), kaban kut ha ka 4 tarik u Risaw bad ia baroh ki jingiakhun yn pynlong ha Pahamsning Cricket Ground, Nongkhrah, Ri-Bhoi.
Kan sa don ruh ka jingpyni Livestreaming ia kitei ki jingiakhun.
Katei ka lympung ialehkai ka long ruh kum ka jingpynkhreh na ka bynta ka BCCI Senior Women’s T20 Trophy, kaban sdang ha u bnai ban wan.
Nalor ka Meghalaya, ki 5 tylli kiwei pat ki jylla jongka NECDC ki kynthup ia ka Arunachal Pradesh, Manipur, Mizoram, Nagaland bad Sikkim. Ka Meghalaya, Arunachal Pradesh bad Manipur ki don ha ka Group A, katba ka Nagaland, Mizoram bad Sikkim ki don ha ka Group B.
Baroh 6 tylli ki jylla kila trei shitom ban kyntiew ia ka jingialehkai Cricket hapdeng ki kynthei bad la sakhi ba kala don ka jingkiew bha.
Ha u 2023-24 ka Sentilemla Imsong jongka Nagaland kala kamai ia ka 50 run tam ne half-century kaba nyngkong ia ka North East Zone, katba ka Debasmita Dutta jongka Meghalaya kala shim 5 wiket kaba nyngkong eh ia ka North East Zone.
Kane ka jingialehkai kala sdang kiew bha ha man la ki district bad ka MCA ka khmih lynti ba ka kynhun kan iohrah ia ka khusnam bad kane kan ym slem shuh ha kine ki snem ban wan.
