Shillong, Lber 14: U nongwad Right to Information (RTI) bah Disparsing Rani hynne ka sngi ula kynnoh ba ki don 10 tylli ki longïng kiba duh noh iala ki baieid ba thoin naka jingpang COVID-19 kiba khlem pat ioh ka jingiarap ba T.50 hajar hapoh Meghalaya.
Haba kren sha ki lad pathai khubor u bah Disparsing ula iathuh ba kat kum ka jingbthah ka Supreme Court jong ka Ri India, la bthah ïa ka National Disaster Management Authority (NDMA), lyngba ka State Disaster Response Fund (SDRF), ban ai T.50 hajar sha ki bahaïing jong kito kiba la khlad na u khñiang jingpang COVID kum ka jingiarap.
“Katkum ka kaiphod jong ka RTI, sorkar jylla lyngba ka State Disaster Response Fund (SDRF), kala pynlut haduh T.6,66,00,000 ban ai jingiarap sha ki longïng ba khlad naka jingpang COVID-19 hynrei ki don kiba la ujor ba kim pat ïoh ïa katei ka pisa” la kynnoh u bah Disparsing.
Halor kane u bah Disparsing ula kyntu ïa kito ki bym pat ïoh iaka song pisa jingiarap ba kin pyntip sha u khnang ba un leh ïa kaba donkam bad kumjuh ruh ba kin leit shaka ophis Revenue Disaster Management ka sorkar naka bynta ban ioh ïa ka hok.
