Shillong, Lber 07 : Ki Pulit ka Shillong Sadar Police Station, hynne ka step sngi Palei, kila lap ia ka metiap jong uwei u nongwan shangkai suwari, uba thiah lyngktar halor ka jingthiah jong ka Hotel, Assembly, Shillong.
Ia une u nongwan shangkai suwari la tip kyrteng da u Si Jo Jacob uba dei Beltola, Guwahati, Assam, kaba long kat kum ka aadhaar card bad ka jingpynrung kyrteng hapoh ka hotel.
Kat kum ka jingiathuh ki Pulit, une u briew ula wan sah ha Hotel Assembly ha ka room nmber 206 naduh ka 28 tarik u Rymphang.
U Superintendent of Police ka East Khasi Hills ula pynthikna ia kane ka jingjia bad ka jingtohkit mynta ka dang iaid shakhmat.
Ki Pulit kila don ruh ka jingsuba ka ne ka jingiap ka lah ban dei na kano kano ka daw ym ba dei na ka jingkem pang kynsan namar ka jinglap ia ka jingphlei snam na ka shyntur jong une u briew.
U Superintendent of Police u pyntip ba ha ka jingtohkit la suba ba ka jingiap ka lah ban dei na ka jingbyaid dawai. U pyntip ba ia kane ka jingjia la phah khubor ruh sha ki bahaiing hasem jong une u briew.
Ia ka metiap jong une u briew la pynkit noh sha Civil Hospital, Shillong ban leh ia ka post mortem.
Ki Pulit ki ong ba ka kaiphod jong ka post mortem ka dei kaba kongsan bha ban lap ia ki daw tynrai ka jingiap jong une u briew.
