Shillong, Rymphang 28: Ki Pulit ka Shillong hynne ka step sngi Thohdieng, kala lap ia kawei ka metiap jong ka kynthei briew kaba thiah lyngktar hajan ka KJP Assembly Conference Hall, kaba don mar pyrshah ka Ophis PWD ha Barik.
Kat kum ka khubor Pulit, ia kane ka jingjia la pyntip nyngkong da uwei u briew ba iatreilang bad hadien bala rah ban kylli jingkylli ia u, ula phla ba u dei ma u hi uba pyniap ia ka.
Kine baroh arngut ki dei kiba iatreilang hapoh ka Trattoria Restaurant.
Kat kum ka jingphla jong u, ki Pulit ki iathuh ba ha ka miet sngi palei, ka jingiania kala mih hapdeng kine ki arngut haduh u pud ba pynlong ia une u briew ba un tied ia ka da uwei u nar rod, kaba lam sha ka jingiap.
Kane ka kynthei ba shah pyniap ka dei kaba la 40 snem ka rta bad ka dei ruh kaba la don khun arngut. Kane ka Longkmie ka dei kaba sah ha Lawsohtun hynrei ka ju sahmiet hapoh ka Restaurant ba ka trei bylla.
Kane ka longkmie ba shah pyniap ka kyrteng ka kong Damonica Laloo kaba trei kum ka nongpynkhuid (cleaner) hapoh ka Restaurant.
Ki Pulit ki iathuh ba u briew uba pyniap ia kane ka longkmie u kyrteng u Sunai Singh uba iatreilang hapoh ka Restaurant.
Ki Pulit kila kem noh ia une u briew bad la rah ia u sha Sadar Police Station ban tohkit.
Ki Pulit kila ker kut ia kane ka jaka naba ka jingtohkit ka dang iaid shakhmat.
