Shillong, Jylliew 07 : Ki Pulit ka Laitumkhrah Police Station, kila ioh ban pyllait ia kawei ka samla lud ba jah na Shillong mynta la jan hynriew bnai, na kawei ka shnong kaba don ha Jylla Bihar.
Kat kum ka jingiathuh u Superintendent of Police ka East Khasi Hills Bah S Nongtnger, kane ka samla lud ba 17 snem ka rta, ka dei kaba jah naduh ka 21 tarik u Nohprah 2022 bad ka dei kaba shong ba sah ha ki thain Laban.
Halor ka ejahar bala ujor da ki bahahiing, ki Pulit kila pynlong ia ka jingtohkit kaba jur bha bad kane ka jingtohkit kala lam sah ka jingioh ksai ba kane ka samla lud ka don sha Bihar.
Hadien ka jingwan sakhi kiba paka, ki Pulit ha ka jingialam u Office in-Charge ka Laitumkhrah KP Singh kila hiar sha Bihar bad hynnin ka sngi Ba-ar, kila lap ia kane ka samla lud na ka shnong Bidupur, kaba don ha Vaishali District.
Ia kane ka samla lud la wan ialam noh sha Shillong ban aiti sha ki bahaiing hasem.
