Shillong, Nailar 10 : U Lungsiej ula mih kum u markhlaw ba pynioh kamai bun eh ha Meghalaya, ong ka jingwad bniah ka Nagaland University kaba la ithuh bad lum jingkhein ia ka jingshongdor ki47 tylli ki mar khlaw bala pyndonkam da ki jaid bynriew ha kylleng ka Jylla Nagaland bad Meghalaya.
Ka jingwad bniah, bala pynlong ha ki 20 tylli ki Shnong bad 250 tylli ki Longiing, ka pyni ia ka jingsynniang kaba khraw jong ki markhlaw bala ithuh kum ki Non-Timber Forest Produce (NTFP) sha ka jingshngain ha ka jingdon ka bam, ka jingsumar jingpang nala tynrai bad ka jingioh kamai ki longiing napdeng ki Jaidbynriew riewlum ba shaniah ia ki marklaw ha kine ki artylli ki Jylla.
Katba u lungsiej u dei uba la ai jingmih kaba bun eh na ki NTFP ha Meghalaya, u sohmarit khlaw u dei ruh uba ki Jaidbynriew riewlum na baroh arjylla kila kheit bad uba ai jingmih kaba bun eh ha Nagaland.
Ki nongwad bniah kila shim jingthoh haduh 47 jait ki dieng bad ki markhlaw, haba bishar ba kumno ki jaidbynriew ki leit kheit, pyndonkam bad die ia ki. Ka jingwad bniah kala buh jingthoh ruh ia ka samoi ba lah ban ioh ia ki, ka jingleit kheit, ka jingpynlut por ha ka jingleit kheit bad ka jingjngai ka jaka ba ki leit.
Ia ki jaidbynriew ha Meghalaya, ka jingshem ia ka jinglah pynmih pisa na kine ki markhlaw ka dei kaba la longdoh longsnam naduh ka jingpynlong marbam nala tynrai bad ka jingpyniaid iew ia ki hynrei ka dor iew ka dang dei kaba dang sahdien bha.
Ka jingwad bniah ka shem ba bun na ki NTFP bala ithuh ki dei kiba ju pyndonkam eh ban bam bad pynkdang, bud pat sa ki lad shna dawai. Ia ki mar ba tam la die sha ki iew shnong, kaba ai ia ka tyllong kamai ia kiba bun ki longiing.
Ki nongwad bniah ki ong ba ka lad kamai na ki markhlaw ka iaid palat ia ka jingleit die beit beit ia ki, namar ka don ruh ka lad ban pynmih mar ba kham remdor na ki, ka jinglah ban sengkam sengjam bad aikam aijam ia ki briew kiba im sha ki jaka ba kyndong bad ba shaniah na ki markhlaw.
Ka jingwad bniah ka pynpaw ba ka thain Shatei Lam Mihngi ka don palat ia ka 33% ki jingthung jingtep ka ri India bad kyrshan ia palat 100 tylli ki jaidbynriew trai muluk kiba shaniah ha ki markhlaw ha ka bam bad ka kamai.
