Shillong, Nailar 10 : Ka Meghalaya ka lah ban iohi ia ka jingmih kham bun ki Iew Khappud ne ‘Border Haat’ da ka jingkyrshan jong ka Parliamentary Committee ban nang pynbun ia ki Iew khappud ka India-Bangladesh ban kyntiew ia ka khaii ka pateng ki trai shnong, ka kamai kajih bad ka jingiadei hapdeng ki nongshongshnong na baroh arliang.
Ka 15th Report jong ka Parliamentary Standing Committee on External Affairs (2025-26), bala wanrah ha Lok Sabha ha u bnai bala dep, kala kdew ia ka bynta jong ki ‘Border Haat’ ha Meghalaya bad Tripura kum ki rynsan ki nongshongshnong ban pyniaid ia ka khaii ka pateng para maki bad ka jingiasam jingtip ia ka kolshor.
Ka Committee, kaba bishar ia ka “jingiadei ba hadien habud hapdeng ka India-Bangladesh” ka ong ba ki kam jngohkai bad ki khaii pateng na ki shnong khappud ki lah ban shim ia ka bynta kaba kongsan bha ha kaban pynkhlain ia ka jingiadei hapdeng ki imlang sahlang, ka ioh ka kot bad ka kolshor hapdeng ki artylli ki ri.
Kala kren kyrpang bad ai jingiaroh ia ki Border Haaat kiba don ha khappud Meghalaya-Bangladesh bad Tripura-Bangladesh, haba pynpaw ba ki dei kiba la pynwandur ban kyntiew ia ka kamai kajih ki briew kiba shong ha ki jaka ba kyndong eh jong baroh arliang.
Ka Committee kala ai jingmut ia ka Ministry of External Affairs ban leh ia ka jingwadbniah ha kaban nang pynbun shuh shuh ia ki Border Haat, haba pynpaw ia ka jingkyrmen ba ka jingpynbun ia ki kan pynim ia ka ioh ka kot ki jaka khappid bad pynkhlain ia ka jingiadei hapdeng ki briew kiba sah ha khappud.
Ka Sorkar kala pynpaw ba kala shimkhia ia ki jingai jingmut bad mynjur ba ki Border Haat kila iarap ban kyntiew shisha ia ka khaii ka pateng bad ia ka jingim ki briew kiba shong ba sah ha khappud.
Kat kum ka jingong ka Sorkar, hynriew tylli ki Border Haat kila treiikam ha shilynter ka khappud India-Bangladesh hashuwa u bnai Nailar 2024, bad ki dang don ruh ki Border Haat kiba dang iaid ha ka jingpyntrei mynta. Haba iadei bad ki Iew thymmai, ka Sorkar ka pyntip ba ka dang don mynta hapoh ka jingiakren bad ka Bangladesh.
Hynrei, ka jingpynbun ia ki Haat kan shong eh ha ka jingiakren bad ki Sorkar Jylla, ka jingdon ia ki jingtei bad ka jingiamynjur lang hapdeng ka India bad ka Bangladesh, ong ka Sorkar.
