Shillong, Nailar 10: U President ka Meghalaya Pradesh Congress Committee (MPCC) bah Vincent H Pala ha ka sngi Nyngkong, u la ialam ia ka jingiakhih daka ba iaid kjat na Madan Fire Bridge sha Don Bosco Square Laitumkhrah, bad dawa ban hiar shuki ia u Myntri Rangbahduh ka riNarendra Modi bad u Myntri ka tnat kam poh iing Amit Shah halor ka jingthmu ban pynkylla ia ka Foreign Contribution Regulation Act (FCRA).
Ka Laitumkhrah ka dei ka jaka ba don bun tylli ki jaka pule ba la pynïaid da ki kynhun niam naduh ka St Anthony’s bad ka St Edmund’s, kiba shaniah ha ka jingbei tyngka jong ka FCRA.
Haba kren ha kane ka jingialang, u Bah Pala u la kynthoh ia ka BJP ba ka la pyrshang ban ai jingmynjur daka bor iaka Bill hapoh ka Parliament ha kane ka taiew.
“Ka BJP ka la pynmih ia ka Whip. Ki lah ban wanrah ia ka FCRA Bill mynta ka sngi, lashai, lane lashi sngi. Ka Parliament ka la buh ban iakren ha ka 13 tarik Nailar, hynrei kin pyrshang ban pynbor lyngba shwa kata” u la ong.
U la batai ia katei ka jingiakhih daka ba iaid kjat kum ka jingpyrshah iaka jingshah thombor ki kynhun niam, ki seng trei mon sngewbha kiba ioh jingiarap pisa na bar Ri kaba nyngkong hadien ka jingioh laitluid ka ri.
“Kane ka Rally ka dei naka bynta ki nong shong shnong, kam dei ka sain pyrthei, kine ki shlem ai jingshakri paidbah kim dei kiba pyrshah ia ka Sorkar India, ki don hangne ban iatrei lang bad ka Sorkar” la ong u bah Pala.
Da kaba khot kynnoh baka jingpynkylla kadei kaba ma tam ha ka histori jong ka ri India,” u Pala u la kdew kyrpang ïa ka Clause 16(a).
“Lada phim lah ban pynthymmai ia ka FCRA jong phi, lane lada phi aiti noh ia ka, ka Sorkar ka lah ban shimti iaki jingdon jingem. Wat lada ka Balang ne ka skul ka ioh tang khyndiat ka jingbei tyngka nabar ri, hynrei iaki jingdon jingem lan shah ban knieh noh”.
U Bah Pala u la ong ba ka Congress kam pyrshah ia ka jingpynjari iaka ain, hynrei ia ka jingpynshitom kaba kyllum lang baroh.
“Ngim don jingeh eiei ia ka FCRA katba dang pyndonkam ia ka ha ka jingthmu kaba dei.
Ngi pdiang sngewbha ia ka jinglong khuid bad ka jingdon ka jingkitkhlieh. Hynrei pynshitom ia kito kiba pyndonkam bakla ia ka pisa, ym ia baroh”, u la ong.
U la maham ba ki jingkylla kin ktah jur ia ka jylla Meghalaya.
“Peit ïa ka St Anthony’s, St Edmund’s bad bun kiwei kiwei ki skul ha kylleng ka Jylla kiba shaniah ha ka FCRA. Lada ym pynthymmai ïa ki laisen bad kine ki jaka pule kin khang noh, ki khynnah jong ngi kin mad jingeh,” ula ong.
“Lyngba ka FCRA ngim ioh ia ki jingtei, Ngi ioh ia ka jingpule, ki hospital, bad ka jingkyrshan ia kiba duk. Lada pynduh noh ia kita ki lad jingiarap bad ka jingkyrduh kam bad ka jingeh kan nang kiew.”
“Kane kam dei shaphang ka jingmyntoi jong ka Party”, u la bynrap.
“Ka Congress ka ïakhun na ka bynta ka lawei jong ki khun ki kti jong ngi” ong u Bah Pala ula la khot ia ka jingiatylli.
“Ka India kan khlaiñ tang ynda baroh ki nong India —ki rit paid, ki balang, ki seng trei mon sngewbha kin ïatreilang. Ka jingthombor iaki rit paid, ki Khristan, ki Hindu, ki Sikh kan nym ïarap ïa ka India,” u la ong.
Ki nongiakhih ki la pynmih ia ki jingpyrta “BJP down down”, “Hiar shuki Modi”, “Hiar Shuki Amit Shah” bad “Ngi dawa ia ka hok”.
“Katba ngi leit ngin iada ia ki paidbah”, la ong u Bah Pala, bad kyntu ia ki nongkyrshan ba kin buh ha ki jingduwai khnang ban ioh iaka jingjop.”
