Guwahati, Rymphang 03: Ha kawei na ka jingjia kaba sngew myllung, ia ka metiap jong uwei u khynnah uba dang 4 snem rta la lapdien ba la shu ieh hapoh ka jaka leit shabar hapoh PWD colony hajan ka madan jong kawei high school barim ha ki bynta shatei ka Assam hapoh Dibrugarh mynta ka step sngi Thohdieng.
Katkum ki pulit la iathuh ba uwei u briew u la iohi ia kane ka metiap ba la tap da ka jain katba u dang leit pynjhieh.Lah ban kdew ba une u khynnah u la shah rahbor noh na ki bynta jong ka Maliparty kaba don ha katei ka sorbah naduh ka 30 tarik u bnai ba la dep.
Na ka liang u superintendent of police ka Dibrugarh, u Shwetank Mishra u la ong, “Ia ka metiap jong une u khynnah uba dang 4 snem la lapdien na ka jaka kaba la shu ieh shrah hajan kawei ka high school barim mynta ka step sngi Thohdieng hadien ba uwei u briew ula iohi ia kane ka met ha ryngkat ka jain.Ngi la dep lypa ban kem ia u briew hynnin ka sngi ia uba la tip kyrteng kum u Suraj Karmakar uba donkti ha kaba rahbor ia une u khynnah.”
“Une u briew uba la shah kynnoh donkti u la don ha ka jaka set jong ki pulit bad ngi dang iaid shakhmat ia ka jingtohkit.Ngi la kem noh ia une u briew hadien ba ngi la iohi ia ki dur video lyngba ka CCTV,” ong shuh suh u Mishra.
Ula ong ruh ba une u briew uba la shah kynnoh donkti u dei uba kyrni ha ka jingdih kyiad. “Ngi suba jur ba u la pyniap ia une u khynnah bad leit bret ia ka met ha katei ka jaka kaba la shu ieh shrah.Ngi la sdang ia ka jingtohkit ban lap ia ka jingthmu kaba sha lyndet halor kane ka jingjia.”
Utei u khynnah u dei u khun jong u Ranjit Bailung uba shong ba sah ha ki bynta jong ka Malipatty hapoh Dibrugarh.Kane ka jinglong jingman ka la pynlong ruh ia ki katto katne ki kynhun nongshong shnong ka Dibrugarh ba kin buh jingkylli ha kaba iadei bad ki rukom treikam jong ki pulit.
“Ki pulit ki la dei ban shimkhia mardor halor kane ka jingjia.Ki dei ban kem mardor ia ki briew kiba donkti.Ki la shim sting halor kane ka jingjia, bad dei na kata ka daw kala wanrah ia ka jingiap,” ong uwei na ki nongshong shnong ka Dibrugarh.
