Guwahati, Rymphang 03: Ki pulit ka Assam ki la kem noh da ki spah ngut ki briew halor ka jingdonkti ha kaba iadei bad ka kam pyniathoh shongkurim ia kiba dang khynnrah rta ha ki bynta bapher bapher ka jylla.
Ki pulit ki la sdang ban pynlong ia ki jingkhynra pyrshah ia ki kam pyniathoh shongkurim khynnah (child marriage) hadien ba u Myntri Rangbah (CM) ka Assam u Himanta Biswa Sarma u la pynbna ban shim ia ki sienjam kiba tyngeh pyrshah ia kiba kum kine ki kam beain.
Na ka liang ki pulit ka Assam ki la rejistar haduh 4,004 tylli ki case kiba iadei bad ki kam pyniathoh shongkurim khynnah ha baroh kawei ka jylla.
Kham hashwa, na ka liang u CM Sarma u la ong; “Ka jingjur ka jingiap hapdeng ki khunlung ba dang shu kha ka dei namar ka jingpyniathoh shongkurim khynnah.Ka jylla ka la sakhi haduh kumba 31 percent ki kam pyniathoh shongkurim kiba dang ha ka rta kaba la khang pyrshah katkum ka ain.
“Ki la don haduh kumba 1 lak tylli ki case kiba iadei bad ki kam pyniathoh shongkurim khynnah bad na ka liang ki pulit ha kine ki 15 sngi ki ban wan kin sdang ia ki jingkhynra ban shim ia ki lad jingpynshitom pyrshah ia kiba donkti.Haduh kumba 11.07 percent ki kynthei ki la hap ban kha khunlung ha ka rta kaba dang khang pyrshah katkum ka ain.Kane ka pyni halor ka jingjur jong ka kam pyniathoh shongkurim ia ki kynthei kiba dang khynnah rta,” ong u CM Sarma.
U Sarma u la ong ruh ba ka sorkar jong u kan pynngat ia ki shynrang kiba iathoh shongkurim bad ki kynthei kiba dang hapoh ka 14 snem rta hapoh ki kyndon ain Protection of Children from Sexual Offences ne (POSCO) Act.
“Ka sorkar Assam ka shim da ki sienjam kiba tyngeh ban pynduh jait ia ka kam pyniathoh shongkurim khynnah ha ka jylla.Haduh mynta la rejistar haduh 4,004 tylli ki case ha baroh kawei ka jylla, bad ki lad pynshitom kan sdang naduh mynta ka 3 tarik.Nga kyrpad ia baroh kin ai ka jingiatreilang,” ong shuh shuh u CM Sarma.
Haba kren sha ki lad pathai khubor, u CM Sarma u la ong; “Ha kine ki 20 snem kiba la leit kam shym la don kano kano ka jingiakren halor ka kam pyniathoh shongkurim khynnah.
Nga la iashim bynta ha kiba bun tylli ki jingialang kiba hapoh bad shabar hynrei kam shym la don ka jingiakren halor kane ka mt.Hadien ka jingiakren halor ka jingkhlad jong ki khunlung ba dang kha bad ki longkmie kiba ioh khynnah, kumta ruh ka mat kaba iadei bad ka kam pyniathoh shongkurim khynnah ka la sdang ban kylla long kaba kongsan.”
