Guwahati, Rymphang 03: Ki pulit ka Assam ki la ioh ban pyllait noh ia kawei ka khynnah nong Nepal kaba dang 16 snem rta napoh Silchar, Assam ka ba la shah die bad shah pynbor na ka bynta ki kam khaii met.
Katkum ki khubor la ong ba ia kane ka khynnah kaba dei na ka thain Pokhara ka Nepal la ioh ban pyllait na kawei ka iing kaba don ha ki bynta jong ka Meherpur kaba hapoh Silchar.Hadien ba la pyndep ia ki lad jingsumar la pynkynriah noh ia ka shapoh Ujjawala Shelter Home ha Silchar, ong u heh pulit.
Ha kawei pat ka bynta, u superintendent of police ka Cachar district u Numal Mahatta u la ong ba ki la pynlong ia katei ka jingleit khynra hadien ba ki la ioh ia ki jingtip kiba bniah na ki tyllong khubor heh sorkar.
“Ki pulit ka Nepal dang shen ki la kem noh ia uwei u briew halor ka jingdonkti ha kaba die ia kane ka khynnah ha kaba u la phla ruh ba kane ka khynnah ka don ha Silchar, Assam.Kumta ruh hadien kane ka jingioh jingtip, ngi la pynlong ka jingthwet kasba jur tad haduh ba ngin da ioh ban pyllait noh ia kane ka khynnah ha kane ka miet sngi Palei ba la dep napoh kawei ka jaka shong shnong,” ong u Mahanta.
Nalor kata u la ong ruh; “Ngim pat shym la ioh kem iano iano ruh ha kaba iadei bad kane ka jingjia.Ngi dang pynlong ka jingtohkit ka ba bniah bad ngin sa kem ia ki briew kiba donkti ha kane ka kam beain tad hadien ba ngi la ioh ia ki sakhi satar ki ba biang.”
Lah ban kdew ba kawei ka longkmie 62 snem rta ka bym biang ha ka bor pyrkhat pyrdain kaba dei napoh Nepal ka dang iai ap na ka bynta ka jingpynkynriah noh naduh kine ki ar snem ba la dep, hynrei na ka liang ki bor sorkar jylla ki la ong ba ki lah ban pynphai pat ia ka sha la iing tad hadien ba ki la ioh hukum na ka sorkar pdeng.
