Nongstoiñ, Ïaiong 20: Da ki 9 tylli ki takma ksiar, 9 tylli ki takma rupa bad 10 tylli ki takma rynnong, ka St Peter HSS Pyndengrei ka la lamkhmat ha ka sngi ba ar jong ka lympung CM 28th District Level Inter School Athletic Meet ba la pynïaid da ka ophis jong ka District Sports Officer Nongstoiñ.
Ka Sib Singh Government Memorial HSS ka la wan ha ka kyrdan kaba ar lyngba ka jingioh ia ki 7 tylli ki takm ksiar, 8 tylli ki takma rupa bad 4 tylli ki takma rynnong. Kumjuh ruh ka Anderson kaba wan ba lai lyngba ki 2 ki takma ksiar, 4 ki takma rupa bad 2 ki takma rynnong.
Haba phai sha ki katto katne ki risol jong ka sngi ba ar, u Deikimawshan Dkhar jong ka St Peter u la khur ïa ka takma ksiar ha ka jingiakop mareh ba 100 jong ka under-16 ki khynnah shynrang. Ha ka 2000 meter race, u Khrawkupar Puweiñ jong ka Don Bosco School Mawkhlam u la khur ïa ka takma ksiar.
Ha ka jingiakop mareh 3000 meter under 18 ki kynthei, ka Rina Ïawphniaw jong ka BBC SC ka la khur ïa ka takma ksiar, katba u John Milton Sohphoh na ka Sib Singh u la khur ïa ka takma ksiar ha ka Under-14 Shot Put ki khynnah shynrang.
Ha kane ka sngi ba ar la jong ka lympung, nalor I DSO Kong Balarina Syiem la donlang ruh ban sakhi da ki katto katne ki kynrem ki lyndan, ba kynthup ïa u Block Medical Officer Dr Tylli Syiem, I Kong V.C War DSWO bad kiwei kiwei, ha kaba ki la shim ruh ïa ka bynta ban sam ïa ki khusnam sha ki nongjop bapher bapher.
