New Delhi, Nailur 10 :U Myntri Rangbah (CM) ka Assam, u Himanta Biswa Sarma ula lait thaw na ka jingmynsaw hadien ba uwei u briew ula kiew beit beit halor ka rynsan kaba u dang aijingkren bad knieh noh ia u tynghung (mike), kata ha ka jingialang paidbah kaba la long hapoh Hyderabad hynnin ka sngi Thohdieng.
Katkum ki khubor la iathuh ba une u briew uba la leh ia kane ka kam u dei u nongtrei jong ka party synshar ka Telangana Rashtra Samithi (TRS).Hadien kane ia une u briew la patan noh mardor nalor ka rynsan da ki nongialam bad ki nongtrei ka BJP.
Kham hashwa jong kane ka sngi, u CM ka Assam ula kynthoh tyngeh ia u CM ka Telangana, u K Chandrashekar Rao halor ka mat kaba iadei bad ka jingsynshar tang jong kawei ka longiing bad ong ruh ba ki kam sain hima sima hapoh ka ri ki dei ban long kiba laitluid na ka jingsynshar jong kawei ka longiing ba khrawbor.
“U CM KCR ula kren na ka bynta ban pynlaitluid na ki kam sain hima na ka BJP, hynrei ngi lakren halor ka sain hima ba la synshar tang da kawei ka longiing. Ngi dang iai bteng ban iohi ia ki dur u khun bad ka khun jong u hapoh Hyderabad.Ia ki kam sain hima jong ka ri dei ban pyllait na ka jingsynshar jong ka longiing,” ong u Sarma.
“Ka sorkar ka dei ban long na ka bynta ka ri, na ka bynta ki paidbah, hynrei ym na ka bynta ka longiing. Ka ri ka dei ban long kaba laitluid bad kaba pdiang ia baroh ki kynhun, hynrei ka jingialam bakla halor kine ki artylli ki dang iai treikam,” ong shuh shuh u CM ka Assam.
