Shillong, Risaw 17 : Ki Pulit ka Jylla kila ioh ban pyllait im ia uwei u rangbah ba 39 snem, Nicolas Lyngkhoi na ka kti ki paidbhur kiba la ialum ban bomshnong ia u halor ka jingsuba ba u dei u “menshohnoh’ ha Lawmei, East Khasi Hills.
Ka jingkloi ban poi ki Pulit ka Lumdiengjri bad ka kynhun SOT kala lah ban iada ia une u rangbah n aka jingshah bomshnong.
U Superintendent of Police ka East Khasi Hills ha ka sngi Palei ula ong ba u Bah Lyngkhoi, u nongpom diengnaMawshynrut, ula shong sahmiet ha kawei ka sem ha ka shnong Lawmei ha ka miet 15 tarik namar ka jingkhriat ka bneng. Hynrei, u trai kane ka sem ula iohi ia u bad ula shondur, kaba la pynlong ia ki marjan marpa ban ialum.
Suki suki ki paidbah kila sdang ban ialum da ka jingthmu ban bomshnong ia u.
Ki Pulit haba ioh jingtip ia kane, kila hiar wut wut sha kane ka shnong bad kila ioh pyllait ia u Bah Lyngkhoi na ka Iingshnong, ka jaka bala set ia u da ki nongialam shnong ban ai jingiada.
“Ha ka jingtohkit ia une u lanot, ula iathuh ba u trei kum u nongpom dieng ha kawei ka khlaw ha Umiam. Ha ka 15 tarik por 9 baje mynmiet, ula mih na Umiam ban leit sah miet sha ka iing ki bahaiing ha Umthlong kaba don ha ka thain Sohiong, hynrei haba poi hajan Lawmei, ula rai ban sangeh noh ban leit sha Umthlong bad ban sahmiet noh ha kawei ka sem ha ka shnong Lawmei namar ba khriat ka bneng” ong u SP.
Ia u Bah Lyngkhoi la wan ialam noh sha Lumdiengjri Police Station bad hadien la ialam phah eksamin ha ki doktor ha Shillong Civil Hospital. Ki doktor kila pynpaw ba une u rangbah ula mynsaw malu mala.
