Shillong, Risaw 14 : Uwei u rangbah ba don jingduna ha ka bor pyrkhat pyrdain, ula shu lait da ka said na ka jingshah bom shnong ha ki paidbhur, kiba suba ba u dei u “menshohnoh”.
Une u rangbah u kyrteng u Bah Arnikstar Ryntathiang (35), uba dei na ka shnong Mawthlong, Eastern West Khasi Hills District.
Kat kum ka jingiathuh u Superintendent of Police ka East Khasi Hills, Bah Vivek Syiem, une u rang bah ula shah bat hynnin ka miet por 9 baje ha ka shnong Kynroh Nongbri namar ka jingpoi iaid wir sha katei ka shnong.
U iathuh ba halor ka jingai jingtip u Sordar ka Krang Nongrum, ki Pulit na Sohiong hapoh ka jingialam u DSP (Ops) Shillong bad O/C Mawngap, kila hiar mar mar sha katei ka shnong bad lap ba ia une u rangbah la set hapoh ka Iing shnong hapdeng ka jingpahara kaba jur na ki Nongialam Shnong bad u Sordar ka Umthlong.
U iathuh ba ki paidbhur kila ialum paidbah shabar ka Iingshnong bad ialun maw haba dawa ban aiti ia une u rangbah sha ki.
“Hadien ka jingpoi ki SOT ha ryngkat u DSP bad O/C ka Mawngap, ia une u rangbah la shimti noh da ki Pulit bad la ialam noh ia u na kane ka Iingshnong” ong u ah Vivek.
Hadien ka jingpyllait ia une u rangbah, ki Pulit kila ialam sha Sohiong Civil Hospital ban phah khmih ha ki doktor ha kaba ki doktor kila pyntip ba ula mynsaw malu mala bad iathuh ruh ba une u rangbah u dei uba don ka jingduna ha ka bor pyrkhat pyrdain bad ba u dang don hapdeng ka jingsumar ha MIMHANS, Shillong/
Ki Pulit kila register ia ka case ha Mawngap Police Station ban nang tohkit shuh shuh bad ban shim ia ki lynti jong ka ain, bynrap u SP.
