Shillong, Nailur 15: Ka Shillong Lajong ka la lait salit na ka jingshah pynhiar kyrdan hadien ba ka la ioh ban pynliem noh da 1-0 kol ia ka Mawkhar haka lympung ialehkai jong ka Shillong Premier League kaba long hynne ka sngi ha madan Third Ground, Polo.
Ia katei ka kol jop na ka bynta ka kynhun la ioh ban thep da u Henry F Nongneng ha ka minit kaba 77 jong ka kylla miet hadien ba ka jingiakhun ha ka kylla step ka la kut noh khlem da don mano mano ruh ba ioh ban thep kol.
Da katei ka jingiakhun hynne ka sngi, ka Malki bad ka Mawkhar ki la ngat ha u laiñ ka jingma watla ka jingiakhun kaba khatduh ka dang don. Ka Lajong kaba sah mynta sa kawei ka jingiakhun ka don 14 point katba ka Malki 10 point bud sa ka Mawkhar 6 point.
Ha ka jingiakhun ha ka kylla kaba nyngkong ka Lajong ka la ioh ban jop da 2-1 bad mynta ka kynti pat ka jop tang 1-0 kol.
Mynta ka Lajong ka lah ban poi wat haduh ka kyrdan kaba saw hynrei kata ruh ka shong pat kumno ka Ryntih bad ka Nangkiew Irat ki ialehkai ha ki jingiakhun ba dang sah.
Ka jingiakhun la shai ka sngi kan long hapdeng ka Ryntih (17 point) pyrshah ia ka Langsning kaba don ha ka kyrdan kaba ar da ki 22 point.Ka jingiakhun ha ka kylla kaba nyngkong ka kut da mar 1-1 kol.
