Shillong, Rymphang 23: Da ki hajar ngut ki paidbah kila ia mih ha ryngkat bad ka jingkthang ka mynsiem, ban leit on tep donburom ia u Bah HDR Lyngdoh, uba long u Myntri Sorkar bad u MLA barim ka Sohiong Constituency hynne ka sngi ha Shilliang Dongki, Sohiong.
U Bah HDR Lyngdoh ula kem pang kynsan haka Lah Sngi u Blei bad la pynkit noh mardor ia u sha Bethany Hospital naka bynta ban ioh iaka jingsumar hynrei ha ka por janmiet une u Rangbah ula khlad noh.
Ka jingkhlad ka jong u Bah HDR kala pynsngewsih kthang ym tang ia ki bahaiing bahasem hynrei ia ki paid nongkyrshan khamtam haba u Bah HDR u dang pynkhreh ban iakhun iaka elekshon MLA ha Sohiong Constituency kum u kyrtong ka seng UDP.
Ha shwa ban leit on tep don burom ia une u rangbah, la pynlong iaka jingialang haka iingsah ha kaba la ioh iaka jingkren na ka iing ka sem, ki riewrangbah bad kiwei kiwei bad ka seng UDP tap ruh da ka lama jong ka seng ia ka synduk kaba la buh ia ka met kaba sah jong u Bah HDR Lyngdoh.
Ki Pastor bad ki Tymmen Basan jong ka Balang Presbyterian Riatsamthiah kila pynlong iaka jingiaseng bad hadien kane la rah bad leit tep don burom ia u Bah HDR ha kaba da ki hajar ngut ki paidbah kila leit ban ai burom bad tep ia u nongialam jongki ha u Lum jingtep ka Balang Presbyterian.
Hashwa kane, haba ki paidbah kila ioh jingtip iaka jingthmu u Bah Samlin Malngiang ban wan sngewlem halor ka jingkhlad u Bah HDR Lyngdoh, kumta ki paidbah kila ialum lut ha surok ban khanglad ia u Bah Samlin ban leit sha iing iap.
Kine ki paidbah kila ong, u Bah Samlin ha ka jingiakhun elekshon pyrshah ia u Bah HDR ula pyndonkam da ki kyntien kaba kim lah ban pdiang namar kala ktah bha ia ki kum ki nongkyrshan u Maheh Don.
“Lada u Bah Samlin ym lah ban iasuk bad u Bah HDR ha ka por kaba u dang im, kum ki nongkyrshan ruh, kin ym lah ban iasuk bad u Bah Samlin bad kam don jingmut hi ruh ia u Bah Samlin ban wan sngewlem mynta ia u Bah HDR Lyngdoh ynda ula iap” ong ki paid nongkyrshan bad ka byrngem ba lada wan u Bah Samlin kin khang beit wat haduh ban da mih kano kano ka jinghuri hura.
Kine ki paidbah kiba la ialum khrui kila ia pra noh hadien ba kila ioh jingtip ba u Bah Samlin ym don jingthmu shuh ban leit sngewlem ia ka iing ka sem jong u Ba h HDR Lyngdoh.
