Shillong, Rymphang 23 : Ka Shillong ka lah ban ioh pynlong tang kawei ka International Football match ha ka jaka jong artylli kaba la buh, namar ka Maldives kala kyrpad ia ka All India Football Federation (AIFF) ban pynkynriah noh ia ka jingialehkai paralok pyrshah ia ka India sha kiwei pat ki madan ialehkai.
Ka Maldives kala buh ia kane ka jingkyrpad haba pynpaw ia ka jingkwah ba ka jaka ialehkai ka dei ban don ia ki lad pyniasoh liengsuin kaba biang sha Philippines.
Ka India kan iakhun pyrshah ia ka Bangladesh ha Jawaharlal Nehru Stadium, Shillong ha ka 25 tarik Lber hynrei la artatien ia ka jingialehkai paralok bad ka Maldives.
Ka Maldives kaba la pynkhreh ban iakhun shen ia ka AFC Asian Cup 2027 qualifier pyrshah ia ka Philippines, ki bor pyniaid kila pyntip sha ka AIFF ba ka jingialehkai ha Shillong kan pynduh lad haduh arsngi ka jingialehkai kilan met namar ka jingbym biang ki lad pyniasoh da ka liengsuin. Namar kata, kila jied ban pynlong noh ha ka jaka ba kham suk ban poi da ka liengsuin.
Watla ka AIFF kam pat pynmih satia ia kano kano ka jingpynbna, hynrei ki khubor ki kdew ba kane ka jingialehkai ka lah ban long noh ha Kolkata ha ka jaka jong ka Shillong.
Wat hapdeng kane, ka Shillong kan thaw histori da ka jingioh pynlong ia ka International Football match ba nyngkong eh hapdeng ka India bad ka Bangladesh kiba iakhun ia ka AFC qualifying round.
