Shillong, Rymphang 23: Haba talasi hadien bala ioh jingtip ba thikna, ki shipai iada khappud Border Security Force (BSF) Meghalaya kila ioh lad khanglad bad kem ïa kiba bun ki briew kiba pyrshang ban prong tuh ïa u pud u sam jong ka Ri bad ka Jylla.
Ha kane ka jingkhynra ki shipai BSF ki la ioh bat ia 4 ngut ki nong Bangladesh najan khappud hapoh ka thain West Jaintia Hills.
Ha kawei ka jingkhynra, ki shipai BSF ki la ioh ban kem sa ia 2 ngut ki nong Bangladesh na jan khappud ka South Garo Hills.
Ïa kine ki jingkhynra la pynlong kum shi bynta jong ki shipai BSF Meghalaya ban khanglad ïa ka jingwan rung kyrthep beaiñ bad kiwei kiwei ki kam sniew haki thain pud.
Ha ka jingïaid lynti ban peitngor haki thain khappud ki shipai BSF jong ka 4th & 1st Battalion ki la iohi ka iaka jingiaid lait lan ki briew ha khappud bad kila ioh ban kem ïa ki 6 ngut ki nong Bangladesh.
Ia kine ba shah kem la aiti noh sha ki thanat ba dei peit ban pynngat ha ki kyndon aiñ.
Ha ka jingtohkit la lap ba don napdeng kine kiba shah kem, ki dei kiba trei kum ki nongshna iing ha Basantpur, Mumbai, katba kawei ka kynthei na Bangladesh, ka la leit sha Mumbai, na ka bynta ban leit sumar iala u kurim.
Ha kawei pat ka jingjia ha South Garo Hills, ki BSF kila ioh kem 1 nong Bangladesh ba thmu rung sha India.
