Lada phah ia ka VPP sha Parliament, khlem poi shong Dorbar baroh 5 snem ba pyrshah kren Hindi

Kyntu u Bah Prestone ia ki nongthep vote ban nym ngop ha ki jingpynbiej ka VPP

Shillong, Lber 07 : U President ka National People’s Party (NPP) ka Jylla bad Symbud Myntri Rangbah Bah Prestone Tynsong ha ka sngi Palei ula ong ba lada phah ia u kyrtong ka Voice of the People Party (VPP) sha Parliament kan long shisha tang ka jingsepei kaba khraw namar un nym poi shong Dorbar baroh 5 snem ba pyrshah ban kren ktien Hindi.

Une u Nongialam ka NPP ula kyntu ia ki paidbah ka Ri-lum Khasi bad Jaintia ba kin nym shah pynbiej ha ka VPP.

Haba kren ha ka 3^rd State Youth Conference jong ka National People’s Youth Front(NPYF), u Bah Prestone ula ong “Dang shen uwei u briew ula  pynsngew ba lada ngi phah ia ka VPP sha Parliament, une u MP un shu mih jyndat beit na IIngdorbar bad yn nym poi shong dorbar baroh 5 snem. Balei? Namar ka VPP kan pyrshah ha Parliament ia baroh ki MP ba kren ktien ktien”.

“Namar kata, ngi dei ban mih nangne bad pynsngewthuh ia ki paidbah ba ki dei ban kyntait ban ai vote khamtam ia u kyrtong ka VPP, uba ieng pyrshah ia ka jingkren ktien Hindi namar un sa mih jyndat beit na Parliament. Lada phi mih jyndat, kaei pat phin kren ha Parliament, kan shu long sepei kai lut” ula ong haba kyntu ia ki paidbah ka Shillong Constituency ba kin kyndit thiah naba ka pork a dang don ia ki ban nym shah pynbiej ha kum kane ka party.

Haba kren halor ka jingmih jyndat ki seng sain pyrthei ka Liang Pyrshah ha ka Dorbar Mang Tyngka ba dang shu dep, u Bah Prestone ula ong “Ngam dei nga uba ong ia ka hynrei kila iohi ia ka kam ba kila leh hapoh ka Iing. Ngam shym la thok hynrei ki briew kila iohi na ka live telecast kaba phalang ba ki dei ki khawpud. Ha ka por ba u Myntri Rangbah u ieng ban ai jubab (ia ka mang tyngka) bad ruh ban batai bniah shaphang ka mang tyngka, ha ka nam jong ka Rule, kila mih jyndat lut man”.

Ula antad ba lehse ki dkhot ka Liang Pyrshah kila peit ia ka jubab u Myntri Rangbah na ki TV bala buh hapoh ka kamra jong ka Liang Pyrshah. Hynrei ula pynpaw pat ia ka jinglyngngoh ba tang u President ka VPP Bah Ardent M Basaiawmoit uba kynnoh ba ka Sorkar ba mynta ka Meghalaya ka dei kaba dap da ki jingartatien suda, kaba mut ba u Bah Ardent u dei tang ma u, uba peit ia ka jubab u Myntri Rangbah na TV.

Haba kyntu ia ka Liang Pyrshah ban sngew laitluid ha kaban pan jingpynshai ia kane, u Bah Prestone ula ong “Ka kamra u Myntri Rangbah ka dei kaba heh bad ka kamra jong nga ruh ka don marjan bad u, kumta nga kyntu ia ki ba kin wan shakhmat namar u Myntri Rangbah u dang kloi ban ai sa kawei ka jingbatai”.

Haba kam ba ka Sorkar MDA-2 ka dei kaba pynkhein record tang ha ki 6 snem, une u President ka NPP Meghalaya ula ong “Ngi la pynkhein ia ka record haba phai sha ka mang tyngka, ka jingkynshew pisa, bad ka roi ka par tang hapoh ka hynriew snem. Namar kata, kito kiba ia hylla kyrkaw ha ki jaka iew ba kin hylla namar ki nang tang ban kren pynheh”.

Ha kajuh ka por, u Bah Prestone ula ong ba ka NPYF ruh ka ieng ban shakri ia ki paid Khasi Jaintia haba bynrap “Balei nga ong ia kane ka long namar ki don katto katne kiba kam ba ki ieid Jaidbynriew palat ban ia kaei kaei baroh hynrei nga ruh nga ong ba ka NPYF ruh ka dei kaba ieid Jaidbynriew palat ban ia kiwei kiwei” ula ong.

U pyntip ba ka jingialang bah eh bha kan sa long ruh ha Adogre ha Ri-lum Garo ha ka 15 tarik Lber, ban pynbit pynbiang ia ka jingpynkhreh jong ka party na ka  bynta ka elekshon Lok Sabha.

Ula kyntu ia ki nongtrei ka party ba kin trei shitom ha kaban pynthikna ba baroh arngut ki kyrtong-Agatha Sangma na Tura bad Ampareen Lyngdoh na Shillong-kin ioh ia ka jingjop ha ka elekshon.

“Ngin thaw record ha kane ka kynti ba mynta ba nangne na Meghalaya ngin phah ia arngut ki kynthei ki ban long ka sur u paidbah ka Jylla sha Parliament” ula bynrap.