Shillong, Naiwieng 03: U President ka Hynniewtrep Achik National Movement (HANM) u Bah Lamphrang Kharbani ula ong “Mynta ka seng ka dang wan ban pynlong iaka jingiakhih kaba jai jai ha Jantar Mantar hynrei lada ka Sorkar Pdeng ka dang leh bym patiaw ia ki mat jingdawa, ka seng kan pynlong syndon da ka jingiakhih kaba heh ha Delhi bad lada jia eiei ka Sorkar Pdeng bad ka Sorkar Meghalaya ki dei ban shim ia ka jingkitkhlieh”.
“Ka jingwan ka jong ngi ha Delhi ka dei ruh ban ai jingkyrshan iaki 60 ngut ki MLA kiba la mynjur iaka Resolution hapoh ka iingdorbar thawain ka jylla bad ban pynsngew iaka jingdonkam sha ka sorkar pdeng bad ka sorkar pdeng ba ki dei ban burom iaka Resolution jong ka iingdorbar thawaiñ ka jylla kaba la dawa ban pyntreikam noh ia ka Inner Line Permit bad ban pynrung noh ia ka ktien Khasi bad Garo haka khyrnit kaba phra jong ka riti synshar ka ri” ong u Bah Lamphrang Kharbani haba iakren bad ki nongthoh khubor.
Ula ong, haduh mynta ka sorkar kam shym la leh eiei ne pyni ia kino kino ki dak ki shin ban pyntreikam noh iaka ILP ha Meghalaya ne ban pynrung noh ia ka ktien Khasi bad Garo haka Eight Schedule jong ka riti synshar ka ri.
“Kane ka jingiakhih kadei tang ka jingsdang bad lada ka sorkar pdeng ka dang leh mynthi ia ka Resolution bad ia ka jingdawa ki paidbah, ka seng HANM ryngkat bad ki dkhot jong ka jaidbynriew na Meghalaya ngin wan da ki hajar ngut. Ngim tip ia kaei kaban jia, lada ngi shah kem, ka sorkar India bad ka sorkar Meghalaya ka hap ban shim ia ka jingkitkhlieh namar ngi sngewthuh ba kine ki 3 tylli ki mat kidei kiba kongsan ia ka jaidbynriew bad ia ka pateng kaban sa wan” ong u Bah Lamphrang Kharbani.
Ula ong ba dei tang ka ILP kaba lah ban iada na ka jingwan rung kyrthep ki bar jylla bad ki bar ri khamtam ia ki Muslim kiba naka ri Bangladesh bad ula ong ba iaka ktien Bodo la lah ban pynrung ha ka khyrnit kaba phra, balei ym shim la pynrung pat iaka ktien Khasi bad ula kyntu iaka sorkar pdeng ba kadei ban tuklar noh mardor ha ka jingpynbeit ia u pud u sam hapdeng ka Meghalaya bad Assam.
“Namar ka jingbym biang u pud u sam, la pynlong langknia ia ki para ri ki jong ngi kiba sah ha khappud bad ngim lah ban klet ruh ia ka jingshah siatiap jong ki para ri ha Langpih bad ha Jaintia Hills bad dei na kane ka daw ba ka seng kala wan ha nongbah Delhi ban pynmih iaka sur jingdawa” ong u Bah Kharbani.
Ula ong, watla kane ka jingiakhih kala kut noh, hynrei ki nongialam ba hakhmat jongka HANM kin dang sah shwa ha Delhi ban buddien halor kitei ki mat jingdawa na ka sorkar pdeng ban ioh iaka jingshai ia kaei kaba ka sorkar pdeng kan leh halor kitei ki jingdawa bad ynda kila ioh iaka jubab kaba shai kin sa pynbna paidbah ynda kila wan phai sha nongbah Shillong.
