Shillong, Naiwieng 03 : Ka Sorkar Pdeng kala pynphai biang ia ka Meghalaya Residents Safety and Security Act hadien ka jingbym pdiang ia ki kyndon bala pynkylla thymmai (Amendment) jong ka Principal Act, 2016.
Ia kane ka pyntip da u Symbud Myntri Rangbah ka Jylla Bah Prestone Tynsong hynne ka sngi Thohdieng haba pyntip ba ka Sorkar Jylla kan sa ia ka jingialang ha ka taiew ban wan bad iakren biang halor ka MRSSA.
U Bah Prestone u pyntip ba ia kane ka jingialang yn pyniaid hi da u Myntri Rangbah ka Jylla bad ki ban wan iashimbynta kin dei ki Heh Ophisar ha kaban iatai kumno ban pyniaid shakhmat ia ka kam.
U Symbud Myntri Rangbah ula pyntip ba dang shen, ka Sorkar Jylla kala pyntreikam ia ka MRSSA, 2016 ha ki 7 tylli ki Shnong ka Nongbah Shillong.
“Kane ka jingpyntreikam ha ki 7 shnong kam dei satia ia ban shim kum ka jingleh ba kynsan kynsan ne ba dang shen namar ka Sorkar kala dep ban thung lypa ia ki District Task Force” ula ong.
“Ngi la bthah ia baroh ki Deputy Commissioner ba kin pyntreikam noh mardor ia ka MRSSA kumba ka long” ula bynrap.
Kat kum ka jingong jong u “Namar ia ka Amendment ym shym la mynjur satia da ka Ministry bad la pynphai pat sha ngi, ngim lah ban ong eiei palat halor ka Entry bad Exit Point”.
