Shillong, Rymphang 28 : Palat 8.5 lak tylli ki Pradhan Mantri Jan Dhan Yojana account la lah ban plie ha Jylla Meghalaya.
“Jan kumba T.186 klur la dei ban mang hapoh ka ram MUDRA (PMMY) ka ban ai jingmyntoi ia palat 14,000 ngut ki briew” ong u Lat ka Jylla CH Vijayashankar haba ai jingkren ha ka Dorbar Mang Tyngka ka Jylla hynne ka sngi Thohdieng.
Kat kum ka jingong jong u, ka Jylla kala trei khlem shongthait ban pynjanai ia ka jingpynioh ia ki jingiarap pisa ia baroh ki nongshongshnong hapoh ka Jylla.
Nalor kane, ka Sorkar ha ryngkat ka jingiatreilang bad ka Meghalaya Rural Bank kila pynkhreh ban wanrah ia ka kor MICRO ATM ki ban ailad ia ki paidbah ba kin pyndonkam ia ki kor hala ki jong ki ktien ki thylliej-Khasi, Pnar bad Garo ba kin siew ia ka pisa lane thep pisa.
U Lat u pyntip ruh ba ka GDSP ka Jylla ha une u snem mang tyngka ba mynta la khmih lynti ba kan kot T.59.228 klur, kaba tam da 11.6% ia u snem bala leit noh.
