Shillong, Rymphang 28 : Ka Sorkar Jylla kala pyntip ba kala kut jingmut ban pynthikna ba yn sat hung briew noh ha baroh ki kam ba lait ha ki Tnad bapher bapher ha ka por kaba biang.
Ha ka Tnad Education, haduh 1091 tylli ki kam nonghikai la dep ban pynbna laitkam bad ka jingpyniaid ia ka thungkam thungkam kala dep. Ka kam ban thung ia kumba 800 ngut ki nonghikai kala nang iaid, ong u Lat ka Jylla Ch Vijayashankar haba ai jingkren hapoh ka Dorbar Mang tyngka hynne ka sngi Thohdieng.
Naduh ba pynkha ia ka Meghalaya Medical Services Recruitment Board ha u snem 2023, haduh 468 tylli ki kam doktor bad doktor bniat lah dep ban thep briew bad ka kam ban thung ia ki nos ruh kala jan dep artad, ula ong.
Ha ka Tnad Pulit, u Lat ula ong ba ka jingthungkam ia palat 3000 tylli ki kam ba lait kala dep mynta.
Nalor kane, ki District Selection Committee bapher bapher ruh kila pyniaid shakhmat ban pyndep noh ia ka jingthung kam thungjam ha ki kam kiba lait.
U Lat ula pynpaw ruh ba ka Sorkar kala pynmih ia ka StandardOperating Procedure ban thungkam hapoh ka por kaba la buh hapoh ka Meghalaya Public Service Commission (MPSC) khnang ban kiar na ka jingpynslem ban pyntip ia ka jinglait kam bad jingpynbna ia ka result thungkam.
La dep thaw ruh ia ka Committee halor ka jingtreikam jong ka MPSC ka ban ai jingmut ban wanrah ia ka jingpynkylla ia ka jingtreikam, ula bynrap.
