Tura, Iaiong 24: Ki Pulit ka South West Garo Hills, kila ioh kem haduh 4 ngut ki briew kiba suba donkti ha ka jingrahbor bad leh be-ijot ia arngut ki Khynnah Kynthei ha Gandhipara, South West Garo Hills.
Kane ka jingjia shah leh beijot kine ki Khynnah kala jia ha ka 17 tarik Iaiong, 2024 ha ka sngi ba dang long ka Mela Changa Bengal, ha ka shnong Gandhipara, kaba don ha khappud ka Assam.
Kat kum ka khubor Pulit, napdeng kine ki 4 ngut, arngut ki dei kiba la ioh kem na Meghalaya bad arngut la ioh kem na Assam.
Ia ki arngut ba kem na Meghalaya, la ioh ban bat na kawei k abos ha Rajabala ha ka 22 tarik Iaiong, katba ki dang thmu ban phetrieh. Kiba na Assam pat la ioh kem na sor Hatsingimari kaba don ha khappud.
Baroh kine ki 4 ngut ki dei kiba kren ktien Bengali bad ki dei kiba don hapdeng 22-26 snem ka rta. Ki Pulit ki dang thwet mynta ban ioh kem sa ia kiwei pat kiba donkti lang.
Kine ki Khynnah kila iadon bad arngut ki khynnah shynrang hynrei ka kynhun ki runar kiba don hapdeng 12-15 ngut, kila thombor ia kine ki khynnah. La iathuh ba ia ki khynnah shynrang, kila teh da ki ksai juti hashuwa ban leh beijot ia kine ki khynnah kynthei.
Ki Pulit ka Jylla kila register case ia kane ka jingjia ha Ampati Police Station hapoh ka POCSO Act.
Ki Pulit ka South West Garo Hills kila thaw ruh ia ka kynhun Special Investigation Team (SIT) ban tohkit ia kane ka jingjia.
Ia kine ki 4 ngut la wan rah sha Ampati, kaba dei ka Head Quarter ka South West Garo Hills District ban pynlong ia ka jingtohkit kaba bniah.
