Imphal, Iaiong 24 : Ki suba kaikhlaw jong ki Jaidbynriew Kuki, kila pynbthei da ki bomb IED ia ka jingkieng kaba pyniasoh ia ka surok ba kongsan eh jong ka Jylla Manipur bad kiwei pat ki bynta jong ka Ri India.
Kane ka jingpynbthei bomb kala jia hynnin ka miet, ha ka jingkieng jong ka surok NH2 ba hap ha Kangpokpi District.
Kane ka jingjia kaba jia ha Saparmenia, kala pyndkut syndon ia ka jingpyniasoh ia ka Imphal bad kiwei pat ki bynta jong ka Ri India. Kane ka jingkieng ka dei ka jingim ha ka kit ka rong ia ki mar ki mata, ka leit ka wan bad buh hapdeng ka jingeh ia ki bor Sorkar ba kin wanrah pat ia ka jingsuk ha ka thain.
Watla kam shym la don kano kano ka jingmynsaw ha kane ka jingjia, hynrei ka jingpynjulor jong kane ka jingpynbthei bomb kala jur bha.
Kane ka jingjia kala buh ruh ha ka jingtynjuh kaba khraw ia Manipur kaba dang pynkhreh mynta ia ka phase-II jong ka elekshon Lok Sabha ha Tamenglong District.
Haduh 260 ngut ki Pulit ka Manipur kila leit sha katei ka thain ban ap pahara na ka bynta ka elekshon hynrei kine ki bor pahara kila kyntu ia ka Sorkar Jylla ba kan pynkynriah noh ia ki na katei namar ka jingbym shngain.
Napdeng kine ki bor pahara, haduh 197 ngut ki dei na ka Jaidbynriew Meitei, kiba sngew ba ka jingphah ia ki sha katei ka thain kan buh ha ka jingma ia ka jingim jong ki. Kila kyrpad ia ki borkhmih ba kin pynkynriah noh ia ki sha kiwei pat ki jaka kiba shngain ban pyndep ia ka kam elekshon.
