Shillong, Rymphang 09 : U Myntri Rangbah ka Jylla Conrad K Sangma ula mih ban kyrshan ia u Lat ka Jylla Phagu Chauhan, u ban sa ai jingkren Lamphrang ia ka Dorbar Mang tyngka da ka Ktien Hindi ha ka 16 tarik Rymphang.
Kane ka jingkyrshan kala wan hadien ba mih ka jingbyrngem jong ka Liang Pyrshah Voice of the People Party (VPP) ban nym iashimbynta ha ka jingkren u Lat lada u kren daka ktien Hindi khlem da buh ia u nongpynkylla ktien.
Haba kylli, u Conrad Sangma ula kren shai ba ka Rule ka shah iano iano ruh ban kren Hindi, halor ka kyndon ba ki dei ban ai ia ka jingthoh bala pynkylla sha ka ktien phareng, bad kane ka dei kaba ju leh.
“Namar kata, kam don nongrim satia ban pyrshha namar ngi la bud kat kum ki rules” ong u Myntri Rangbah haba bynrap ba u Lamphang ka IIngdorbar ula pyntip sha phi ba ula pynbiang la ka long lyngba ka Artificial Intelliigence (AI) ne da kano kano ka jingpynbeit, ha kaba ki MLA ki lah ban sngap ia ka jingkren ha ka ktien Phareng lada ki kren da kiwei kiwei ki ktien.
Kumta ban pynlong ishu ia kane hi ka dei ka bym don jingmut, ula ong haba pynkynmaw ba, ki don ruh ki khep ki khep ba ki MLA kila kren da ki ktien bapher bapher ha Iingdorbar Thaw Ain.
Haba pynpaw ba u Lat ka Jylla u don ha ka jingduna ban kren phareng bad kumta un sa kren da ka Hindi, u Myntri Rangbah ula ong ba kam don satia kano kano ka jingleh bakla ha kane.
“Nga sngew ba kaei kaba kham kongsan ka dei ki symboh kiba don ha ka jingkren u Lat bad kaba kham kongsan shuh shuh, ka dei ka jingiakren ka ba ngin sa iakren ba kumno ngin shim rai bad iatai ia ki ishu kiba kongsan jong ka Jylla..nga sngew ba ngi dei ban pynleit jingmut ia kane ha kane ka Dorbar” ula ong.
