Shillong, Iaiong 11 : Hadien ba ka Prof Sherwin M Sungoh kala shimti kum ka Vice Chancellor In-charge ka North Eastern Hill University, ka seng ki nonghikai – North-Eastern Hill University Teachers’ Association (NEHUTA) bad ki Nongtrei- ka Non-Teaching Staff Association (NEHUNSA) –kila pynbna ba ki ai ka jingkyrshan ba pura ia ka.
Hadien ka jingialang hapdeng ka NEHUTA bad NEHUNSA ba long hynne ka janmiet sngi Thohdieng, kine ki artylli ki seng kila pdiang sngewbha ia ka rai ka Prof Sungoh ban iehnoh ia ka shuki kum ka Pro Vice Chancellor jong ka Shillong Campus bad ban shimti ia ka kam kum ka Acting Vice Chancellor da kaba long ka Professor bala rangbah duh kat kumka 2(A)(5)(i) jong ka University.
U President ka NEHUTA Prof. Lakhon Kma ula ong ba ki seng kin kyrshan ia ka Prof Sungoh ba kan pyndep ia ki kam ba ka shimti kat kum ki jingbthah jong ka Ministry of Education.
Ula pyntip ruh ba ka Prof Sungoh, kum ka Acting VC, kala ioh ia baroh ka bor kum u Vice Chancellor ba pura ban pyniaid ia ka jingthungkam-la ka dei ki nonghikai ne ki nongtrei.
“Kumta ngi kyrmen ba da kane, ki kam kin sa iaid beit noh hapoh kane ka skulbah, khamtam ha kine ki sngi ban wan. Lada mon u Blei, ngin sa ioh ia kaei kaba ngi kwah, lehse ngi lah ban ioh ia u/ka VC ba biang eh, hynrei kane kan sa long ha ki sngi ban sa wan” ong u Prof Kma.
Ha kajuh ka por, u Prof Kma ula pynshai ruh ba kam shym la don kano kano ka shithi ne jingthoh ba la iohpdiang na ka Ministry of Education halor ka jingshimti ka Prof Sungoh kumka Acting Vice Chancellor watla ia ka shithi la dep phah naduh ka 9 tarik Iaiong, 2025.
Ha ka shithi sha ka Ministry, ka Prof Sungoh kala pynpaw ba haba khmih ia ka jinglong jingman hapoh ka skul bah bad ki jingdawa jong ki kynhunbapher bapher, ka long kaba eh shibun ia ka ban treikam kum ka Pro Vice Chancellor hapdeng ki jingpynbor kiba bun. Ka pyntip ba ka jingialang jong ka School Board ka University kala dep bad ki jingai jingmut ki dang ap mynta ban ioh ia ka jingmynjur jong ka Academic Council | Executive Council ki bym don satia ha ka bor ban ialum jingialang.
“Halor kine ki nongrim bala kdew haneng, nga jied ban buh ia ka shithi iehnohkam na ka shuki Pro Vice Chancellor bad ngan treikam kum ka Vice Chancellor (In-charge) da ka jinglong kum ka Professor ba rangbah tam kat kum ka Statutes 2(A)(5)(i) jong ka skul bah, ha ryngkat ka bor pyniaid kam bad pyniaid ia ka pisa tyngka ka ban long mardor” kala thoh.
Ha kajuh ka por, u Prof Kma ula pynbna ba ka VC In-charge ka lah ban ai jingmynjur ia ka CAS, ban pynlong ia ka jingialang ka Finance Committee, jingialang ka Academic Council, jingialang ka Executive Council bad wat ban thungkam shipor kynthup ka jingthung ia ki Pro VC.
Ula bynrap ba ka Acting VC kam lah satia ban pynkylla thymmai ia ki kyndon ka University Act, Statutes, Regulation lane ki Ordinance.
Ha kajuh ka por, u Prof Kma ula kyntu ia ka Dr Fameline K Marak ba kan iehnoh ia ka kam Pro Vice Chancellor jong ka NEHU Tura Campus.
 bad ki Nongtrei- ka Non-Teaching Staff Association (NEHUNSA) –kila pynbna ba ki ai ka jingkyrshan ba pura ia ka.){kind=link}