Shillong, Jylliew 27 : Ka Sorkar Jylla kala kular ban ai ka jingkyrshan ba pura ia i meirad bala 76 snem ka rta Kong Kmoin Wahlang, i ban leit mihkhmat ia ka Ri India sha ka jingiakop mareh marathon jong ka Pan Pacific Master Games, 2024 ka ban long ha Gold Coast, Australia.
U Myntri ka tnad ialehkai ka Jylla Bah Shakliar Warjri hynne ka sngi Palei, ula synran ia ine i meirad ban iakynduh ia u Myntri Rangbah ka Jylla Conrad K Sangma ha Meghalaya Secretariat.
Haba iakren bad ki nongthoh khubor hadien ka jingiakynduh, u Bah Shakliar ula ong “Kumba ngi tip lyngba ki lad pathai khubor, I Kong Kmoin in mihkhmat ia ka Ri India ha Australia. In iashimbynta ha ka jingiakop mareh marathon ba 10 Km, 5 Km, 3 Km, 1.5 km bad 500 meter. Nga la iakynduh marmet ia I bad u Myntri Rangbah ruh ula kwah iakynduh markhmat ia i ban kular ia i ba ka Sorkar ka don hangne ban iarap. Ngi kitbok ia i bad kyren ba in wanrah takma ym tang ia ka Jylla hynrei ia ka ri baroh kawei”.
Haba kylli ia ka jingsngew jong u halor ka jingleit mihkhmat I Kong Kmoin shabar ka Jylla, u Bah Shakliar ula pynpaw “Nga ngeit ba kala pynsngew sarong ia ka Jylla baroh kawei ban iohi ba i Longkmie ha ka rta jong i, 76 snem ka rta, in iashimbynta ha ka iakop mareh ba 10km. Ka dei ka khyllipmat ba sngew sarong ia ka Jylla bad ka Ri. Ngi sngew kmen ha bad kitbok ba in ioh ka met ba koi ba khiah bad ka jingkyrkhu u Blei ha ka lynti iaid jong I”.
I kong Kmoin Wahlang, uba ju iashimbynta ha ki jingiakop mareh ia ka lynti kaba jngai, ila shah khot ban iadonlang bad ka kynhun ka India na ka bynta ka 13th Pan Pacific Master Games 2024, ka ban long ha u Naiwieng ha Queensland, Australia. Ka jingshah jied jong i kala urlong da ka jingiakop mareh ba pyniapbiej ia baroh ha ka lympung ba long haba sdang une u snem ha Hyderabad.
I Kong Kmoin I ban iashimbynta ha ka iakop mareh ba 800m, 1500 m, 3000 m ha ka thup ki nongiamareh ba 75 snem shajrong, ila pynpaw ia ka jingkmen hadien ka jingiakynduh ia u Myntri Rangbah ka Jylla bad u Myntri kam ialehkai. I kyrmen skhem ba kan ai mynsiem iaka pateng ban wan bad ai khublei ia ka Sorkar halor ka jingai jingkyrshan.
Ila bynrap “Nga kymen ban ioh khur medal shabar ka Ri bad wanrah nam ym tang ia ka Jylla hynrei ia ka Ri baroh kawei”.
