Nongpoh, Iaiong 01 : U MLA ka Jirang constituency Bah Sosthenes Sohtun, ula kyrpad ia ka Sorkar Jylla ba kan pynsted ha kaban phah ia ki lad jingiarap sha ki phew phew tylli ki Longiing kiba ngat ha ka apot ka jingwan lynshop ka eriong erngit hynnin ka janmiet sngi U Blei hapoh ka constituency.
Haduh 66 tylli ki Iing kila shah pynjulor bad kumba 200 ngut ki nongshongshnong kila shah ktah jur na ka jingwan lynshop ka eriong bad u lapbah hynnin ka janmiet ha kylleng ki shnong kiba hap hapoh ka Jirang C&RD Block. Nalor ki iing ki sem, wat ki jingthung jingtep ruh kila shah pynjulor ha kane ka eriong.
Haba iakren bad ki nongthoh khubor, u Bah Sosthenes ula ong ba kane ka eriong kala wanrah ia ka jingduhnong kaba khraw ia ki nongshongshnong ka thain bad kaba sngewkhia eh ka dei ba bun ki Longiing kila ngat ha ka jingshah pynjulor ki Iing bad poi sah shipor ha ki Iingdorbar Shnong bad ki Iingskul.
U Bah Sosthenes ula ong ba ki shnong kiba la shah ktah ha kane ka eriong ki kynthup ia ka Pamumsylliang, Umshalini, Rani, Gonpati, Jalpaham, Matang, Jirang, Umsohpai bad kiwei kiwei ki shnong kiba la pyntip bad kiba la ioh ban ia kren lyngba ki telephone.
U Bah Sosthenes u iathuh ba kane ka eriong kala pynjulor ruh ia ki jingthung jingtep jong ki paid nongrep ka thain ba kynthup naduh ki diengkwai, ki diengjri (rubber) bad kiwei kiwei.
“Nga la shimkhia ia kane ka kam naduh hynnin hi ka sngi hadien ba ioh jingtip ia ki jingpynjulor…Nga la iakren bad u BDO uba la phah ia ki briew ban leit jurip bad lum jingkhein. Nga la iakren ruh ia u Deputy Commission ba un pynpoi ia ki lad jingiarap sha ki lanot” ula ong.
U Bah Sosthenes ula pyntip ruh ba ula iakren bad u Symbud Myntri Rangbah ka Jylla Bah Prestone Tynsong haba kyrpad ba un phah pynpoi kloi ia ki lad jingiarap sha ki lanot hapoh ka thain.
