Shillong, Iaiong 13 : Ka kynrum kynram ba dang iai bteng ha North Eastern Hill University (NEHU) kala pynsngewkhia jur ia ka Sorkar Meghalaya, kaba la kyrpad mynta ia u Lat ka Jylla C.H.Vijayashankar ba un tuklar bad iarap ban pynbeit noh ia kane ka kam.
U Myntri ka tnad Pule Puthi Rakkam A Sangma ula sngewjur jur ia kane ka kynrum kynram kaba la neh slem bad ong ba katba ka Sorkar Jylla ka don da u pud ban tuklar ia kane ka kam, hynrei kala iai bteng ban iakren bad ka Ministry of Education ban wad ia ki lynti ha kaban lah pynbeit noh.
“U Myntri Rangbah jong ngi ula iakren khlem sangeh bad ka Ministry bad ula iohpdiang ia ki jingtip ia kat kaba jia. Nga ruh nga la shimkhia bad iakren ia kane ka kam bad ka Sorkar Pdeng ban wad ia ki lad ki lynti ban pynbeit noh khamkloi katba lah ia kane ka kynrum kynram” ong u Myntri.
Ula bynrap “Ngi la iakynduh bad iakren ia kane ka kam bad u Lat ka Jylla bad la kyrpad ia u ba un iakren lem ha ka kyrdan jong u”.
Haba kyntu ia baroh ki kynhun, u Rakkam ula ong “Nga kyrpad shimet ia ki samla pule ka NEHU, ki Nonghikai bad ruh ia u Myntri ka Ministry of Education-lada ia kane ka jingeh yn lah ban pynbeit noh kham kloi, kan long ka jingbha ia baroh. Haba kut ka sngi, kane kala pynthut ia ka pule ka dangle hapoh ka campus, kaba ngim kwah satia ban iohi”.
U Myntri ula pyntip ruh ba ka jingiakren ka dang iaid bad ki samla pule jong ka skulbah ban sngewthuh khambha ia ki jingsngewkhia jong ki bad ban iawad lem ia ki lynti ban pynbeit.
 kala pynsngewkhia jur ia ka Sorkar Meghalaya, kaba la kyrpad mynta ia u Lat ka Jylla C.H.Vijayashankar ba un tuklar bad iarap ban pynbeit noh ia kane ka kam.){kind=link}