Nongpoh, Nailar 28: Ka RBYF Mawtnum Unit kala pynpaw ka jingsngewkhia halor ka jingjot jong ki khun samla namar ka jingkyrni haki jingdih buaid khamtam u drok u ba la jyllei ha kylleng ki jaka jong ka Ri Bhoi khamtam ha ka thaiñ Nongpoh kaba ap ruh ka jingma kaba khraw ïaka imlang ka sahlang lada ym lah ban tehlakam bad ban pynduh pyndam ïa u drok.
Haba kren bad u nongthoh khubor, u Samla Peace Maker Makri President ka Mawtnum Unit bad u Samla Alberto Nongsiej Vice President ka Nongpoh Circle kila ong ba kum ka seng ka dap da ka jingsngewkhia ban iohi ba ka jingjyllei u drok uba la sdang pynjot ia ka jingim jong kiba bun ki khun samla kynthei bad shynrang.
Kila ong ba une u jingdih ula sdang ruh ban poi wat sha ki khynnah kiba dang rit bad kiba dang heh dang san kiba dang donkam ka jinghikai bad ka jingïeid.
Kila ong ruh ba dei ka jingjyllei u drok bala pynkharoi ïaki ba bun ki kam sniew haka imlang ka sahlang bad kam long shuh kaba shngaiñ ban iaid ban ieng khamtam haba la kem dum.
“Ki kam tuh kam thiem kila sdang ban kynrei bha ha ka thain bad la suba jur ba ki dei ki kam jong ki nongdih droks kiba la leh ia kine ki kam bymman tang ban ioh pisa ban thied droks” kila ong.
Namar kane ka RBYF kala kyrpad ruh ïaka tnad pulit ba kan shimkhia ha kaba ïadei bad ka jingjyllei jong ki nongdih bad nongkhaii drok, khamtam ban ïaid pahara ha kylleng ki jaka haba kular ruh ba naka liang ka seng kan ai ka jingïatreilang bad ka tnad pulit naka bynta ban rat diengkhong ïa u drok.
Hakajuh ka por naka liang ka seng kala maham ruh ïaki dukan ba kim dei ban die ïaki biri, sikret bad kiwei kiwei ki jingbam kiba ktah ïaka koit ka khiah sha ki heprit bad ki khynnah skul, bad lada lap naka liang ka seng kan sa leh da kab tyngeh, kila bynrap.
