Shillong, Naiwieng 03 : U Myntri ka kam bording Bah Metbah Lyngdoh ula kyntu ia ka Sorkar Pdeng ban bishar thymmai biang ia ka bailut baisep na ka bynta ka solar scheme, haba kdew ia ka jinglut jingsep ba kham heh ha ka jingpyndait ia ki kor ha ki jaka lum ka Meghalaya.
Haba kren sha ki nongthoh khubor ha ka sngi Nyngkong, u Bah Metbah ula pyntip b aula kren ia kane ka kam ha ka jingia lang ba dang shen bala pyniaid da u Myntri ka Tnad Bording ka Sorkar Pdeng, kaba long ha Guwahati, Assam.
Ula kren halor ka jingiapher hapdeng ka bailut baisep bala buh da ka Sorkar Pdeng kaba long T.55,000 ha ka shi kilowatt bad ka jinglut jingsep ha Meghalaya kaba kot haduh T.80,000 – T.85,000 shi kilowatt. Kane kala lam sha ka jingduna ban shim ia ka PM-KUSUM scheme, wat hapdeng ka jingpyrshang ka Jylla ban pynheh ia ka subsidy sha ka 45%.
U Bah Metbah ula ban jur ba ka bailut baisep bala buh mynta kamiahap satia bad ka jinglong ki jaka hapoh ka Jylla haba ong “Kane kam shym la pynshlur lane pynngeit ia ki nongioh skhim ba kin wan shakhmat ban shim lane ban ioh jingmyntoi na ka skhim”.
Ka Meghalaya kala pyndait sa palat 2000 tylli ki solar pump bad kyrpad ban pynthymmai ia ka bailut baisep bala buh khnang ban kyntiew ia ka jingpyndonkam ia ka bording solar.
