Nongpoh,Nailur 12: Ka Dorbar Shnong Nongpoh hapoh ka jingïalam jong u Bah Sylvestar Mynsong kum u Rangbah Shnong ka Nongpoh, Samla Anthony Suchiang Secretary Shnong lem bad ki dkhot jong ka Dorbar Shnong bad ka Seng Samla Shnong Nongpoh kila leit iakynduh ïa u Ophisar Incharge jong ka Nongpoh Police Station ban ïakren halor ka jingnang kynrei ki kam sniew hapoh ka thain Nongpoh bad khamtam ban ïakren ruh halor ka jingjia shah kyndang ki dukan kiba la jia ha kine ki sngi kiba la leit.
U Rangbah Shnong ka Nongpoh ula pyntip ba na ka liang ka Dorbar kala leit ban buh ïaki jingkyrpad ha ryngkat bad ka jingthoh ïaka tnad pulit jong ka Nongpoh halor ka jingnang roi ki kam runar ban phrong tuh ïaki dukan kiba don ha ki surok bah jong ka sor Nongpoh bad ka jingnang roi ruh kiwei kiwei ki kam runar kiba ju jia man la ka por khamtam ha ki por mynmiet mynïong.
Ula ïathuh, ba ka Dorbar Shnong kala buh ïaka jingkyrpad ïaka tnad Pulit ban shim khia bad ban peit pyrman ïa kine ki kam sniew kiba ju jia khah khah bad ka kyrpad ban phah ïaid pahara ïa ki Pulit man la ka miet khnang ba kin nongleh ïa katei ka kam sniew kin nym ïohlad.
U Rangbah Shnong ula ïathuh ruh ba ka Dorbar Shnong Nongpoh kala buh ruh ïaka jingkyrpad ïaka tnad Pulit ba kin weng noh ïaki Kali Aksident kiba la shu sah khongreng ha ki Surok Service Lane namar ka jingdon kitei ki Kali ha katei ka bynta jong ka Surok kala wan rah ïaka jingthud haka ïaid ka ïeng jong ki paidbah nongleit nongwan.
U Ophisar In charge ka Nongpoh Police Station u MR Marak, ula ïathuh ha kaba ïa dei bad ka jingteh lakam ïaki kam sniew kiba la sdang ban mih ha ki Surok bah jong ka sor Nongpoh, na ka liang ki bor Pulit ki la ïaleh ban buddien ïa kine ki kam khamtam ïa kine ki kam runar kiba la jia ha kine ki sngi.
Ula ïathuh ruh ba ka tnad Pulit kala sdang ban pynlong ïaka jingïaid pahara miet “Night Patrolling” ha baroh ki bynta jong ka surok bah ha kaba kila ïoh ruh ban kem ïaki nongleh kam sniew ha kine ki sngi kiba la leit.
U Ophisar Incharge ula ong ruh, ha kaba ïa dei bad ka jingkyrpad ban pynkynriah noh ki Kali Aksident kiba la pyndonkam ban buh ha ki Surok Service lane na ka liang jong u kum u nongpeit jong ka Police Station un sa kren sha ki bor kiba halor bad na ka liang ka tnad Pulit kin sa pyntip pat ïa kaei kaba dei ban leh.
