Shillong, Nailar 08 : Ka Sorkar Jylla kala shimti pura ia ka jaka ban tei ia ka Meghalaya House-II ha Kharghar, Navi Mumbai, ka ban ai shibun ki jingmyntoi ia ki nongpang bad ki samla pule ka Jylla bad ka thain Shatei Lam Mihngi ruh kumjuh.
U Myntri Rangbah ka Jylla Conrad K Sangma ula pyntip ia kane ha ka rynsan social media, haba ban jur ba kane ka project ka dei kaba la pynwandur ban pynsuk ia ka leit ka wan ki paidbah ka Jylla sha kane ka nongbah kaba dei ka pla tyngka jong ka Ri.
“Ia ngi, kane kam dei tang ka jingtei ia ka building ba thymmai. Ka dei ka jingpynthikna ba haba k briew jong ngi ki leit sha Mumbai, ban leit sumar, pule puthi, treikam lane kino kino ki kam, kila don ka jaka ban sah kaba ki sngew kum ka iing la jong” ong u Myntri Rangbah.
Da ka jingnang bun ki nongshongshnong ka Meghalaya kila leit sha Mumbai khamtam ban leit sumar jingpang bad leit pule ia ki kyrdan kiba shalor, ka Meghalaya House-I ba don mynta ha Vanshi kala mad ia ka jingeh ban ai jaka ia baroh.
“Kane ka jingtei ban mih ha Kharghar la khmih lynti ba kan nang pynkhlain bun shah ia ka rukom ai jingkyrshan bad pynting ruh ia ki nongleit nongwan na Jylla” ula pynpaw.
Nalor ka jingshakri kum ka Guesthouse, ki Ophisar kila iohi ba ka Meghalaya House-II kan long ka pyrnon ka ban pyniasoh ia ka kolshor hapdeng ka thain Sepngi ka Ri India bad ka thain Shatei Lam Mihngi.
U Myntri Rangbah ula pynpaw ia ka jingsngewnguh ia u Myntri Rangbah ka Maharashtra Devendra Fadnavis bad ka Sorkar Maharashtra namar ka jingiatreilang bad ka jingkyrshan ban pynurlong ia kane ka jingaiti ia ka jaka, kaban plie lynti ia ka jingiateh kaba khlain ha ka ioh ka kot bad ka kolshor hapdeng ki ar Jylla.
