Shillong, Nailar 08 : Ka Raid Laban Dorbar Pyllun kala pynpaw ia ka jingkyrshan ia ka Shillong Ropeway project bad kyntu ia ka Sorkar Jylla ban pyntrei sted noh wut wut ia ka project.
Hadien ka jingiajurip lang bad ki Ophisar na ka Tnad Tourism, Forsest, PHE bad Shillong Municipal Board, u President ka Dorbar Bah Losterson Sun ula ong ba ka project ka hap hapoh ka jaka jong ka Dorbar bad kan ai jingmyntoi bha ha ka kam jngohkai.
“Ngi, kum ka Raid Laban Dorbar Pyllun, ngi dei ki trai bad ngi khmih ia ka Shillong View Point. Na ka liang jong ngi, ngim don satia kano kano ka jingpyrshah. Ngi kyrshan ia ka project” ong u Bah Sun.
Ula bynrap b aka ropeway project kan wanrah ia bun ngut ki nongwankai sha ka viewpoint.
“Bun na ki nongjngohkai kinwan lyngba ka ropeway project. Da ka jingwan kane ka project, ngi kmen bha namar ki nongjngohjaia kin leit da ka ropeway sha Shillong View Point” ula ong.
U Bah Sun ula ong ba kane ka jingtyrwa ka dei kaba la iakren nyngkong mynta la saw snem eiei bad la kyrpad ia ka Sorkar ba kan pyniaid wut wut ia ka kam.
“Ngi la kyrpad ia ka Sorkar ban pynsted noh wut wut ia ka project” ula ong.
