Shillong, Nailar 26: Ka Congress kaba don ha Liang Pyrshah ha ka sngi Ba-ar, kala kyntu ia ka Sorkar Jylla ba kan buh ia ki jingthoh dak (signage) kiba paka ha man ki jaka rung (Entry) bad jaka mih (Exit) jong baroh ki surok bala ai nam sha ki riewpawkhmat ka Jylla.
“Nga kwah ban kyrpad ia ka Sorkar Jylla ban buh ia ki jingthoh dak (signage) na ki jaka rung bad jaka mih jong ki surok bala ai nam sha ki riewpawkhmat” ong u Nongialam ka Liang Pyrshah Ronnie V Lyngdoh haba wanrah ia ka jingkylli bynrap hapoh ka Dorbar Synrai hynne ka sngi Ba-ar.
Ula ai nuksa ia ka surok Jail Road kaba la ainam ha ka kyrteng u nongiakhun laitluid ka Ri-lum Jaintia U Kiang Nongbah, hynrei haduh mynta ka dang iai neh ka kyrteng kum ka Jail Road.
Kumjuh ruh ka long ia ka surok kaba la ainam ha ka kyrteng u Mahatma Gandhi, Don Bosco bad kiwei kiwei ki kyrteng jong ki riewpawkhmat.
“Namar kata, kine ki surok bala jer kyrteng ha ki riewpawkhmat ki dei ia kaban da buh jingthoh ha jaka ba iohi bha ki briew…ban ai burom ia kiwei ki riewpawkhmat kiba la noh synniang sha ka Jylla bad ka Ri” ong u Bah Ronnie.
Halor kane, u Myntri ba khmih ia ka GAD Rakkam A Sangma ula kular ba ka Tnad kala dep iakren ia kane ka kam bad ka Tnad Public Works Department (PWD) bad ka Shillong Municipal Board (SMB) ba kin leh ia kaba donkam.
U Myntri ula buh jingthoh ruh ia ki jingai jingmut jong u MLA ka TMC na Nongthymmai Bah Charles Pyngrope ha kaban pyntbeit ia ka kyrteng jong ka Mother Theressa Road sha ka Saint Theressa Road.
 kiba paka ha man ki jaka rung (Entry) bad jaka mih (Exit) jong baroh ki surok bala ai nam sha ki riewpawkhmat ka Jylla.){kind=link}