Shillong, Nailar 27: U MLA ka UDP na Mookaiaw Bah Nujorki Sungoh ha ka sngi Ba-ar, ula kyrpad ia ka Sorkar Jylla ba kan pynkloi noh ia ka jingmang pisa ban shna ia ka surok na Madan Pohkseh sha Lakasein.
Ula ong ba kane ka surok ka long kaba kongsan bha ban kyntiew ia ka kamai ka kajih jong ki briew na ki artylli ki District ka East Jaintia Hills bad West Jaintia Hills
“Nga kyrpad ia ka Sorkar Jylla ban sngewbha pynkloi noh ia ka jingmang pisa ia ka surok namar kan nang kyntiew ia ka ioh ka kot jong baroh artylli ki District. Ka kamai ka kajuh jong ki briew ruh kan kiew bha” ula ong ha Iingdorbar Thaw Ain.
Haba jubab, u Symbud Myntri Rangbah ba khmih ia ka PWD Bah Prestone Tynsong ula pyntip ba ka sor jamin ka dangiaid shaid shaid mynta na ka bynta ban shna ia kane ka surok.
“Ka jingiakren ruh kala don bad ki trai jaka. Shisien ba ngi la iasngewthuh jingmut, ngin sa iasoi ia ka gift deed bad ngin sa pynkhreh ia ka Detailed Project Report (DPR)” ula ong.
