Shillong, Nailar 27: Ka kynhun ialehkai phutbol U-15 ka Meghalaya kala rung sha ka phainal jong ka 63rd Subroto International Cup 2024 hadien ka jingpynliem ia ka Bangladesh da 2-1 kol ha ka jingiakhun kaba long ha ACS Centre ha Bangalore hynnin ka sngi Nyngkong.
Ka Nongjri Presbyterian Higher Secondary School, kaba mihkhmat ia ka Meghalaya, kala pyni ia ka jingtbit pyrshah ia ki khynnah ialehkai ka Bangladesh lyngba ka jingioh ia ka penalty ha ka minit ba 36, kaba la shut da u Marc R Marak ban ioh tam da 1 kol.
Hynrei, hashuwa ban kut ka kylla step, ka Bangladesh kala ioh ban pynphai bad pyniakhaid ia ka jingiakhun da 1-1 kol.
Haba wanphai sha ka kylla miet, ka kynhun ialehkai na Meghalaya kala iakhun dohiap ban tynjuh ia ka Bangladesh bad dei ha ka minit ba 59 ba kala ioh ka lad ban pynkhih ia ka jar kaba la wan lyngba u heprit Prosperwell Ryntong, uba la ioh ban thep ia ka kol.
Ka jingioh thep kol kala neh da 2-1 haduh ba kut ka 90 minit ka por jingiakhun.
Da kane ka jingjop, ka kynhun ialehkai ka Meghalaya kala ioh rung sha ka phainal bad kan hap ban iakhun pyrshah ia ka kynhun ialehkai ka Uttar Pradesh ka ban long shibit janmiet por 4:30 baje.
