Shillong, Naitung 07: U Myntri Sorkar bad MLA ka UDP na Khliehriat constituency Bah Kyrmen Shylla u la pynpaw ia ka jingkyrmen ba ka jingtih dewiong da ka stad saian (Scientific Mining) kan iarap ban wanrah biang ia ka ioh ka kot kaba ki paidbah ka ri-lum Jaintia ki ju ioh mynshwa na u dewiong, ha kajuh ka por kan pynneh pynsah ruh ia ka mei mariang.
“Ngi kyrmen ba da ka jingsdang jong ka jingtih dewiong da ka stad saian (Scientific Mining) kan ai biang ia ngi ia kaei kaba ngi dei hok ban ioh bad kumno ngi pyndonkam ia u dewiong namar ba u dei uba la ai da U Blei. Ngi dei ban pyndonkam ia u ha ka rukom kaba dei bad ha kajuh ka por ngi dei ban pynneh pynsah ia ka mei mariang. Kam dei ia ngi ban pynjot ia ka mariang tang ban ioh kamai” la ong u Bah Kyrmen.
U Bah Kyrmen u la ban jur ia ka jingdonkam jong ka Sorkar ban iatreilang bad ki paidbah ban pynneh pynsah ia ka mei mariang wat hapdeng ki lad kamai jakpoh.
U la kdew ruh ia ka jingktah kaba jur jong ka jingkhang dewiong ia ka kamai kajih bad iaka jingim jong ki paidbah ha Jaintia Hills, kiba la ialeh ban wad ia kiwei pat ki lad kamai mynta la palat 10 snem tam hadien ba khang tih dewiong.
U Myntri u la iaroh ia ki sienjam baka Sorkar ka shim ban kyntiew ia ka kam jngohkai pyrthei ha katei ka thain hynrei u la ban jur ba donkam shuh shuh ia ka jingkyrshan ban siew kylliang ia ka jingduhnong haka kamai ka juh na ka daw ka jingkhang tih dewiong.
“Ka la palat 10 snem ki briew ki la ïaleh bad ki dang pyrshang ban wad ki lad ki lynti. Ha kane ka jingïaid lynti, ka long kaba sngewtynnad ban ïohi ba ka Sorkar ka pyrshang ban kyrshan ha kiba bun ki liang hynrei em khlem artatien kam pat biang hynrei ngi dang kyrmen ba ka jingnoh synñiang bad jingkyrshan kaba ngi la ïoh na ka Sorkar Jylla haba ïadei bad ka jingïarap kan long kaba kham bun shuh shuh ban kyrshan ia ngi,” u la ong haba bynrap “Phi la iohi ba bun ki khana ki la mih shaphang kaei ka jingnoh synniang jong u dewiong bad kumno ki briew ki ioh ia ka lad ban leit pule shabar ri hynrei hadien ka jingkhang tih dewiong, ka la ktah ia ngi baroh.”
U Bah Kyrmen u la iathuh ba haduh mynta 4 ngut ki don kiba ioh laisen na ka bynta ka jingtih dewiong daka stad saian (Scientific Mining) hynrei ka jinglong jingman jong ka jingtreikam mynta kam pat shai bha.
“Nga kynmaw ba u khun jong u Thomas Nongtdu ki la sdang. Hynrei kaei ka jinglong jingman mynta ngam da tip bha. Ngi khmih lynti ba kane kan noh synniang bad iarap ia ki paidbah ka Jaintia Hills” u la ong.
 kan iarap ban wanrah biang ia ka ioh ka kot kaba ki paidbah ka ri-lum Jaintia ki ju ioh mynshwa na u dewiong, ha kajuh ka por kan pynneh pynsah ruh ia ka mei mariang.){kind=link}