Ai burom u Conrad ia u PM halor ka Women Reservation Bill
Shillong, Iaiong 16 : U Myntri Rangbah ka Jylla Conrad K Sangma ula pynpaw ia ka jingkhmih lynti ba ka Meghalaya kan ioh kham bun ki shuki MP ha Parliament hadien ka jingpynbeit thymmai ia ki constituency, haba pdiang sngewbha ruh ia ka Women’s Reservation Bill bala wanrah ha ka Dorbar Kyrpang jong ka Parliament.
“Hooid, nga don ka jingkhmih lynti (ban kiew ka jingdon MP) bad nga sngew ba haba khmih ia ka jingdon paid nongshongshnong bad ka jinglong jingman ki jaka, ka Sorkar India bad ka Delimitation Committee kan khmih ia kine ki bynta ruh bad ngi don ka jingkyrmen ba ka jingmihkhmat jong ngi ha Parliament kan kiew hynrei kumba nga ong, ngi hap ban ap bad peit” ong u Conrad haba iakren bad ki nongthoh khubor ha ka sngi Palei.
Halor ka Women’s Reservation Bill, u Myntri Rangbah ula shim ia kane kum ka “sienjam kaba pdiang sngewbha”.
“Kane ka dei ka jingdawa kaba la slem bha, ka mat kaba la sahteng la shem bad kane ka dei ka kam kaba lah dei ban leh naduh mynno hynrei ngi hap ban ai ka burom ia u Myntri Rangbah Duh namar kane ka sienjam kaba ula shim” ula bynrap.
U Conrad ula ong ba kane ka Bill ka weng noh ia ki jingduna ha ka jingdon ki nongmihkhmat kynthei.
“Ngi kmen bha halor kane ka rai bad ha kaei kaei kaba donkam ha kano kano ka kyrdan, ngin kyrshan ia ka” ula kular haba bynrap “Ha kajuh ka por, nga kyntu ia baroh ki seng sain pyrthei, baroh ki seng ba don ha ka imlang sahlang ba kim kyrshan ia kane ka jingpynkylla ba kum kane namar kan dei na ka bynta ka bha ka miat jong ka Jylla bad ka ri baroh kawei”.
Halor ka jingpyntreikam ia ka Bill ha ryngkat ka jingpynbeit thymmai ia ki constituency, u Conrad ula ong ba baroh kine ki kam ki dei kiba hap ban pyniaid bha jai.
